Sinulog sa Sugbo 2020

Kon maoy atong basihan ang Sinulog souvenir program sa tuig 1980, ang unang  Sinulog sa Sugbo, kining atong pag-Sinulog karon  mao ang ika-40 ka tuig nga sumad sa atong Sinulog grand parade.

Apan, niadtong moinsister nga nga ang unang Sinulog gisaulog sa tuig 1981, ila sad to, ug ika -39 pa ka tuig kining atong pagsaulog karon sa Sinulog sa Sugbo. 

Apan, una sa tanan, ang unang pasaulog sa Fiesta Senior dinhi sa atong dakbayan, nahitabo niadtong Abril 28, 1566, first anniversary sa pagkakaplag ni Juan Camus sa imahen ni Sto. Niño. Ug niining tungora, matud pa, “there was a jubilant celebration, “diin ang mga natibio nagsayaw-sayaw dala ang pangaliya ug mikamaykamay sa ilang mga kamut sa ilang kahimuot pagsud-ong sa imahen ni Sto. Niño.

So, dugay na gyud kaayo kining atong devotion ug pagsaulog sa Fiesta Señor ug kining atong pag-Sinulog, ug nagpadayon kini hangtud karon, diin nagkadaghan na, lakip ang mga batan-on ang nagpakita sa ilang debosyon ngadto sa Balaang Bata.

Sa unang adlaw sa Misa-novena niining tuiga, atong namatikdan ang pagdagsang sa bagang duot sa katawhan within the vicinity o sa kadalanan palibot sa simbahan sa Sto. Niño.

Mga alas 3:00 kadto sa hapon, duna unta koy tuyo sa City Hall, apan, wala ako makalahos sa City Hall tungod kay close to traffic ang kadalanan palibot niini ug sa simbahan sa Sto. Niiño.

Mo-park na lang unta ko sa Plaza Independencia, apan puno usab sa nag-park nga mga sakyanan. Niuli na lang ko.  Yes, baby, unang adlaw sa Misa-novena, daghan na kaayong tawo ang midagsang sa dakbayan. 

Ug angay masayran nga sa ato nang gisaysay dinhi, ang unang Sinulog festivities gisaulog sa tuig 1980, dili 1981, nga gipasiugdahan sa Ministry of Youth and Sports Development; the Augustinian Community; Confradia del Santo Niño de Cebu, in coordination with the City Government of Cebu, Association of Regional Executives of National Agencies in Region 7 (ARENA 7), ug Rotary Club of Talisay.

Ang mga mihatag sa mensahe, sila si David S. Odilao Jr, Director sa MYSD ug amahan sa Sinulog;  Gov. Eduardo R. Gullas; City Mayor Florentino Solon; Rev. Fr. Medardo Durmiendo, OSA, Rector sa Basilica del Santo Niño de Cebu; Mrs. Josefina R. Gullas, Presidente sa Confradia del Santo Niño de Cebu.

Walo ka tunghaan ang misalmot sa Sinulog sa Sugbo ’80, ang Cebu Central Colleges;

Cebu Institute Technology, Cebu School of Arts & Colleges, Colegio de San Jose Recoletos, Southwestern University, University of San Carlos,  University of Southern Philippines, University of the Visayas.

Ang Executive Committee gilangkoban nila ni Mayor Solon, Honorary Chairman; Odilao, Chairman; ug mga miembro: Fr. Durmiendo, Josefina Gullas, Labor-7 Director Francisco Arnado, Atty. Leonardo Manlosa.

Ang over-all choreographer si Myhc Gonsalez, giabagan ni Jesus Labrador, for synchronization. Mga historical researcher sila si Domingo Estabaya, Resil Mojares, ug Virgilio de la Victoria.

Duha ra ka adlaw ang kasaulogan: January 19, 1980 – Holy Vispers, procession sa imahen ni Sto. Niño, 4:00 pm, ug sa January 20, 1980 – Kahulogan sa piyesta – 8:00 am, Solemn High Mass nga gisaulog sa mga Augustinian Recollect Fathers sa CSJ-R, diin ang tanang misalmot sa Sinulog sa Sugbo, mitambong sa Santos nga Misa.