Turista sa Sinulog mogamay?

Nainat ang mga kilay sa mga tag-iya’g hotel ning dakbayan sa Sugbo human nila makita ang dakong pag-us-os sa gidaghanon sa mga turista nga mitsek-in sa ilang hotel ning mga semana nga nagsingabot ang kapistahan ni Senior Santo Niño ug Sinulog 2020.

Base sa naandan, kon lingion ang nangaging kapistahan ug Sinulog, unang semana pa lang sa Enero, may mga hotel nang ma-fully booked.

Gani, gumikan niini, may hotel nga matental sa pagpataas sa ilang room rate agig pahimulos sa kahigayonan, diin ang supply diyotay unya ang nanginahanglan daghan.

Matud pa ni Hotel Resort and Restaurant Association of Cebu Inc. (HRRAC) President Carlo Anton Suarez nga ang naukopar nga rooms sa mga hotel ning semana, diin nagsingabot na ang unang misa nobenariyo alang sa kapistahan ni Sr. Sto. Niño, mikabat lamang og 50 ngadto sa 60%.

Lahi sa miaging tuig 2019, diin ang room occupancy rate miabot og 60 ngadto sa 70%.

Gitumbok ni Suarez nga ang mga online business transactions maoy hinungdan sa pag-us-os sa ilang room occupancy kay kuno mitanyag ang mga tag-iya’g condo units, kuwarto o balay ngadto sa mga turista ubos sa barato nga presyo.

Ug tungod niini, naapektohan ang ilang income sa dili momenus 30 ngadto sa 40 porsiyento, nga atua mahipunta sa ilang online competitors nga walay gibubong dakong puhonan kun bahin sa marketing ug advertising strategies ang hisgutan.

Tingale, usa lamang kini sa mga rason nganong mihinay ang room accommodation rate sa mga hotels. Kini tungod kay ang mga hotels, condominiums, apartments ug pension houses nga atong makita sa palibot nagkaanam na sab bayag kadaghan. Busa, dayag na lang, nga mabahinbahin ang mga turistang mo-check in.  Kining pagbahar sa room occupancy rate sa mga hotel, usa ba ka tilimad-on nga modiyotay ang mga turistang mobisita aron pagsaksi sa Sinulog 2020?

Sukad, wala pa mahitabo nga midiyotay ang mga turistang misaksi. Kay bisag duna nay mga gidili ug dinhay higayon nga giulan, daghan gihapong  turista ang miapil sa pag-Sinulog. Sanglit, sumala pa sa nakasinati, kutob sa unsay ilang giampo-pangayo sa Balaang Bata, gihatag.

Matang sa milagro nga makatubag sa pangutana: “Mogamay ba ang mga turista ning umaabot Sinulog?”