Mga agawon giawhag

Giumentohan na tuod ang minimum nga sweldo sa mga empleyado dinhi sa Dakbayan sa Sugbo ug sa ubang kanait nga dapit, apan ang pangutana kun paigo ba ang P404 nga daily wage bisan upat lang ang sakop sa pamilya?

Lakturon na lang nako pag-ingon nga ang maong kantidad kuwang gyud tawon kaayo. Ako gani nga kaniadto piloon man og katulo ang maong kantidad sa akong sweldo, nagkuwang pa man gani? Samot na gyud ngadto sa mga kawani nga wala hatagi sa tukmang sweldo.

Awhagon nako si Regional Director Salome Siaton sa Department of Labor and Employment (DOLE) nga paspasan gyud ninyo pagsusi kon kinsa sa mga employers ang wala mohatag sa tukma nga sweldo ngadto sa ilang mga kawani.

Ubos sa bag-ong minimum wage nga giaprobahan sa Regional Tripartite Wages and Productivity Board-7, ang sweldo sa mga kawani sa mga agricultural establishments, ubos og gamay.

Modayeg gyud ko sa mga employers nga mapinanggaon kaayo ngadto sa ilang mga kawani. Usa kanila si Jun Cubarol nga mihatag gyud og tukmang sweldo sa iyang mga kawani, ug kon “out of town” ang ilang biyahe, may overtime pay sila ug allowance nga para pagkaon.

Ang amigo sab nako nga si Mark Boyo, dagko kaayo’g sweldo sa iyang mga kawani, ug gilibre pa niya sa ilang bayad sa SSS, ug panahon sa Pasko, silang tanan magsanuoy pagpas-an sa ilang mga pinaskohan.

Tanang kawani hatagan og tagsa ka sakong bugas, raffles nga pwerteng daghana nga lupig pa gani ang ubang dagkong kompaniya. Ingon sab niini ang gihimo sa lain nakong kumpare nga sila si Arnel Guibincan ug mare Jennifer ngadto sa ilang mga kawani.

Agi og pagdasig sa mga employers nga mohatag gyud kamo sa tukmang sweldo sa inyong mga kawani, sunda ninyo ang mga tagdumala kompaniyang Aboitiz nga maoy tag-iya sa VECO.

Malambuon ang ilang tanang kompaniya kay maayo man sila moatiman sa ilang mga kawani. Ang tag-iya sa The Freeman ug Banat News, usa sa pipila ka employers sa Sugbo nga unang nanghatag og 14th month pay sa ilang mga kawani, sukad pa kaniadto.

Kun panggaon ninyo ang inyong mga kawani, sila mobugti sab sa inyong mga kaayo. Sila magbinuotan ug motrabaho gyud, ug moresulta kini og kalamboan sa inyong mga negosyo.

* * *

Balikon nako sa pagpahibawo nga nagsugod na ang akong programa sa radyo Lunes ngadto sa Biyernes, gikan sa alas 8:30 ngadto sa alas 9:30 sa gabii.

Ang akong programa nga giulohan og “Birador” motuki sa mga isyu nga naglambigit ang publiko.  Kuyugi ko ninyo sa akong programa alang sa dugang kasayuran.