Paambit ni Padre Porio, SDB

ENERO 5, 2020: Domingo sa Epipanya sa Ginoo

Mga Pagbasa: Is. 60;1-6/Sal. 72/Ef. 3;2-3.5-6/Mt. 2;1-12

Usa sa akong mga paisano mao si Padre Peter Porio nga taga Catmon. Ang dili nako makalimtan mao man ang iyang pagpaambit kalabot sa hilisgutan sa Infancy Narrative of Jesus. Naglalis ang mga Heswita ingon man ang mga Dominikano kun unsa gyud  kining maong butanga. Ang Salesyano niingon kanila: “Mas maayo nga atong pangitaon ang tulo ka mga hari kun three kings kay anaa kanila ang funding!” end of joke.

Ang pangutana mao: “Mga hari ba gyud sila?” sila ang mga mago sa griyego nagpasabot kini og maalamon. Ilang gipangita ang bataang balaan pinaagi sa lamdag ug giya sa bitoon. Kini ang hinungdan kun nganong sulod sa hataas nga panahon sila nagpangita sa maong bata aron ilang simbahon. Gani, matud pa sa ubang sulugilanon nga duna kunoy ikaupat nga maallamon ug ang maong maalamon nakigkita sa batang balaan didto na sa balabag sa krus.

Historical figure man sila o dili ang mahinungdanon mao ang ilang kasinatian sa pagtuo nga nagdala kanila sa maong pakighimamat. Gidala nila ang mga gasa sa Bulawan, Insenso ug Mira. Ang Insenso nga nagpasabot pagkapari nga nagdapit kanato sa kinabuhi sa pag-ampo, ang bulawan nagpasabot sa kinabuhi sa pagkahari nga gihulagway diha sa mapaubsanong pagpangalagad ug ang mira bisan pa man kun mahimong humot diha sa atong panimhot apan pait kaayo alang sa atong dila. Simbolo kini sa tam-is apan sakit nga pagpasakit sa atong Ginoo alang kanatong mga tawo. Ang iyang kamatayon sa krus mao man ang atong katubsanan sa atong mga sala.

Apan labaw sa tanan ang kasaulogan sa Epipaniya kun pagpadayag sa Ginoo ngadto sa tanang katawhan mao man ang timaan sa iyang mas malukpanong pagdawat sa katawhan nga nahimong ulusahon diha sa Diosnong laraw sa kaluwasan.

Dili siya Dios alang sa pilila, Dios gyud siya alang sa tanan! Ang pag-ampo karong Dominggoha nagkanayon: O Dios, karong adlawa gipadayag mo ang imong Bugtong Anak ngadto sa katawhan pinaagi sa pagtultol sa bituonm. Itugot nga pinaagi sa kahayag sa pagtuo makasud-ong kami sa katahom sa imong himaya diha sa langit. Kini among gipangayo pinaagi ni Cristo among Ginoo. Amen.