Walay pagtagam

Napakyas ang mga ahensya sa gobierno sa target niini nga zero casualty sa mga pabuto sa pasko ug bag-ong tuig.

Aduna gyuy mga nabiktima sa fireworks ug stray bullet base sa talaan sa Department of Health dinhi sa Central Visayas.

Mikabat sa 38 ang nalista sa RESU 7 nga mga nabuthan nga naglakip kini sa mga nabiktima sa fireworks, ug naa usay stray bullet.

Ang Dakbayan sa Sugbo ang labing daghan nga adunay 12, gisundan sa Lapu-Lapu City 6, Mandaue 3, Talisay 3 ug Minglanilla 2.

Usa ka stray bullet sa Mandaue City, Samtang sa Talisay kaso gyud diay sa pagpamusil.

Taliwala pa man sa hugot nga kampanya sa kagamhanan nga nagdili sa pag gamit og pabuto ug armas de fuego dili gyud mahitabo nga ma zero tungod sa ka gahi sa ulo sa mga tawo.

Ang nakaparat kay mas daghan ang nabiktima nga inosente o kadtong naamong lang kay sa kadtong nagdagkot gyud.

Seguro panahon na nga estriktohon ang pag regulate sa pagpamaligya sa mga fireworks o dili nalang gyud tugtan aron wala nay kapalitan ang mga tawo.

Ang kapolisan nakasakmit og 1.5 million worth sa mga fireworks ug gipaubos sa destruction gahapong adlawa.

Gikan kini sa nagkadaiyang dapit sa rehiyon diin sagad sa mga nasakmit kadtong mga gamhanan nga pabuto.Naay dalogdog, goodbye Philippines ug uban pa nga makahimo gyud og danyos sa kinabuhi sa tawo.

Kada tuig nalang gyud ingon niini ang sitwasyon nga dili gyud maleksyon ang mga tawo nga makaamong pa. Sakit man alang sa mga nanginabuhi sa pabuto apan gikinahanglan nga adunay lig-ong palisiya nga himoon ang gobiyerno aron masolbad kining problemaha nga mao ang pagpahunong na sa produksyon sa pabuto.

Hinoon naa ra usab sa mga tawo kun makakat-on og tagam apan kun padayong ibalewala ang safety sila ra usab ang mabiktima.