Palihi

Taliwa niining modernong panahon, nagpabiling buhi ang karaang tradisyon sa mga Pilipino nga gipasapasa na sa daghang henerasyon—ang palihi matagtuig.

Kinahanglang dunay 12 ka klase sa lingin nga prutas diha sa talad kan-anan inighagtok sa orasan sa tungang gabii sa Disyembre 31 aron sugaton ang bag-ong tuig.

Kinahanglang magsul-ob sa swerte nga kolor sa mosulod nga tuig o ba kaha magsul-ob og saput nga dunay printa nga lingin.

Kinahanglang mag-andam og sinsiyo nga ikatag sa matagsu-ok sa panimalay.

Ug kinahanglang puno ang tanang sudlanan sa bugas, tubig, asin, mantika, ug uban pa.

Ang uban dili sab mopagawas og kwarta atol sa bag-ong tuig aron kuno dili molayas ang swerte sa tibuok tuig.

Usa sa mga palihi nga gisunod sa kadaghanan hangtud karon mao ang pagbaton og 12 ka klase sa lingin nga prutas.

Ang maong tradisyon gikabay-an ug gipahimuslan sab sa mga negosyante. Kini maoy hinungdan nga panahon sa bag-ong tuig di hapit mahikap sa kamahal ang mga lingin nga prutas.

Doble ang presyo sa naandan panahon sa ordinaryong mga adlaw.

Bisan ang hilaw ug linghod pa nga prutas ibaligya sa ngalan sa palihi.

Ambot nganong hangtud ron daghan pa gihapon ang motuo og palihi.

Dili makuha sa palihi ug swerte ang bahandi ug kaharuhay nga buot nimong makab-ot.

Ang kakugi ug paningkamot inubanan sa panalangin sa kahitas-an maoy labing epektibong paagi pagkab-ot sa kahamugaway og dili ang pag-usik-usik sa imong kwarta ug kahago sa mga lingin nga prutas.

Bisan og inyong susihon ang kinabuhi sa tanang malampusong tawo sa kalibutan, way usa nila nga nagsalig lang sa palihi nga way paningkamot.

Busa ayaw kalimot nga niining bag-ong tuig, kakugi ug paningkamot ug pagsalig sa kahitas-an maoy nasuwayan na nga formula aron makab-ot ang kahamugaway.