Pasko sa Parokya

Nahimong busy ang tanan kanamo dinhi sa Madridejos alang sa among gipahigayong tiningob nga Christmas Party sa Parokya. Tumong niini mao nga magkahiusa gyud ang tanan kaysa mag iyahay na lamang og saulog sa Pasko sa Pagkatawo sa atong Ginoo. Daghan ang among gihimong duwa duwa ug uban pa, kaon sa mga gipangdala ug ang paghimo og himamatay sa usab usag usa. Nindot ang maong kasinatian kay at least nahimong mas makahuloganon ang kasaulogan kun kini imong himoon diha sa konteksto sa katilingban.

Usa sa mga obserbasyon sa kadaghanan mao nga dali man tuod ug paspas ang kahimanan sa communications technology apan nahimong daw haguka usab ang natad sa kalambigitan nga tawhanon. Sa akong naobserbahan daghan ang mga bata nagkapundok apan walay tingganay. Kini tungod kay busy kaayo sila sa ilang mga gadgets. Dunay mga bana ug asawa ang nahimong duol tuod sa video calls ug uban pa apan nahimong mas bakakon ug maluibon ang matag usa kanila. Daghan man tuod ang atong gipang post nga mga inspirational quotes diha sa social media apan kita mismo nga naghimo sa ingon ang nahimong bored mao nga ni post kita sa pamasin nga makakuha kita og mga likes gikan sa atong mga followers kana kun duna.

Pasingot ang tuyo kun nganong pagahimoon ang mga parlor games. Matud pa ang matag parlor game paagi sa paglikay sa mga stress kay gawas nga maka premyo makalingaw pa. Bahala na tingali kun dili gyud ingon kadako ang premyo sa matag duwa apan ang moment dili mahimong kabayran og bisan unsang salapi. kay ang kalingaw ug kalipay dili man mahimong i convert gyud unta sa salapi. apan mao kini ang nahitabo karon. Gitugbangan og salapi ang matag kahago to the point nga nahanaw ang diwa sa pagtinabangay ingon man gumikan sa kalisdanang financial mahimong ibaligya o pabayran ang kaangayan ni bisan kinsa nga mobuong sa dungog o mohunos sa kinabuhi sa uban. Kini ang hinungdan kun nganong daghan ang buot na lang mohilom bisan pa man kun gikinahanglanon gyud unta ang illang pagtingog aron sa ingon makab-ot ang hustisya nga gikanahanglan sa usag usa labina kanila nga anaa sa mga pidpid nga dapit ning atong katilingban.

Samtang puno sa bahakhak ang tanan ug nahimong busog ang kadaghanan gumikan sa mga gipangdalang kalan-on nakita ko ang akong kaugalingon nga nihilom aron akong tigumon ang maong kasinatian diha sa akong kaugalingong kasingkasing. Ang kalinaw nga akong gipaabot nakab-ot ko na ba? o padayon ba akong nangita sa kahulogan sa kinabuhi taliwala sa katilingban ug katawhan nga sama nako samaran usab nga dako. Hangtud kanus-a kutob ang akong bili ingon nga tawo o higala? Samtang mapahimuslan pa ang akong kusog?  Daw sa masamad ang akong kasingkasing sa dihang nakita ko ang akong higala sa dihang may gipabuhat kanamo ang among labaw. Nagmasakiton na intawon si Mam ug sa dihang ako siyang gipangutana kun giduaw ba gyud siya sa mga nagsugo namo kaniadto aron mamahimong mabayaw ang ilang labaw, siya nagkanayon: "Ambot ba, wa naman gyud sila mopatim-aw!: Dayag sa akong hunahuna ang hinungdan. Kini mao nga siya paralisado na ug dili na mahimong mapahimuslan ni bisan kinsa bisan gani kanila nga anaa sa mga hawanang sagrado sa kintolimbo sa atong

pagkatawo.