EDITORYAL - Dili isalig sa palihi

Unyang tungang gabii sugaton sa kalibotan ang bag-ong panid sa panahon. Kini mao ang tuig sa 2020 ug kadaghanan sa mga tawo nangindahay nga unta sa sunod tuig swertihon na sila ug mas mosaka ang kabutang itandi sa tuig 2019.

Apan demalason gyud ang tuig kun karong gabii atol sa selebrasyon magpaturagas lang ang mga tawo sa palibot, pataka og pabuto, overload sa kuryente, patuyang og kaon og tambok o paghubog-hubog bisan gibawalan tungod sa hyper tension ug daghan pang uban.

Kun simbako masunog ang balay tungod sa pabuto, o overloaded ang kuryente tungod sa kadaghan sa mga gipangsaksak sa plug; o ba kaha atakehon na ba hinuon sa sakit tungod sa sobrang pagkaon og mga gidili o ba kaha nakakita hinuon og away sa silingan unya napatay o maoy nakapatay, magmalipayon kaha ug swertihon pa ang tuig 2020?

Kaning tanan dili imposibleng dili mahitabo ni bisan kinsa. Sama nalang aning mga biktima sa mga saag nga bala ug pabuto nga nangakabsan sa kinabuhi, nabuta o nangapungkol, daghan man niini ang natala sa nanglabay nga pagsugat sa bag-ong tuig.

Human sa hitabo, walay bisan usa sa mga nabiktima o sa ilang mga banay ug bisan gani sa mga iresponsableng tawong hinungdan aning dili maayong mga panghitabo ang makaingon nga swerte pa gihapon ang bag-ong tuig.

Busa kinahanglang mag-amping ang tanan ug magpakabana sa tanang oras atol sa selebrasyon.

Sa pikas bahin, nahimo nang tradisyon ug kostumbre sa mga Pilipino ang mga palihi ini og sugat sa bag-ong tuig aron swertihon. Maayo kini nga kabilin para sa mga mosunod nga henerasyon tungod kay duna silay matiman-an ug paabuton.

Apan ang swerte dili angay isalig lang sa mga palihi, kinahanglang ang tawo mismo maoy molihok pagpangita sa swerte kay ang palihi dili man na motrabaho.

Naa sa tawo ang pagbuhat, naa sa Ginoo ang kaluoy. Busa lihok.