EDITORYAL - Pasko’y masaya pa rin sa kabila ng problema
TOTOO na kakaiba ang mga Pilipino sa pagharap sa problema. Kahit na dinaanan ng delubyo, magsasaya at magdiriwang pa rin ngayong Pasko Kahit Paskong tuyo, maligaya pa rin ang Pasko. Patuloy pa rin ang pagsasaya kahit na dinaanan nang maraming problema.
Kamakalawa, isang trahedya ang biglang dumating sa mga kaanak ng nalason ng ininom na lambanog sa Rizal, Laguna. Sa huling report, 10 na ang namatay at marami pa ang nasa ospital at inoobserbahan. Tiyak na sa ospital magpapasko ang mga nakaligtas. Ang mga namatayan, tiyak na kakaibang Pasko ang kanilang tatamasahin. Ganunman, pilit pa rin nilang pasasayahin ang Pasko. Tuloy pa rin ang Pasko sa kabila nang nangyaring trahedya. Walang makakapigil sa pagdiriwang ng pagsilang ng mananakop.
Hanggang sa kasalukuyan, nasa isip pa ng mga biktima ng Bagyong Tisoy ang bangis ng hangin na nagwasak sa kanilang bahay at sumira sa mga pananim. Tila isang bangungot ang tumamang bagyo sa Bicol Region at Southern Tagalog provinces sapagkat nag-iwan nang napakalaking sira at marami rin ang namatay. Hindi nila alam kung paano babangon. Pero sa isang babaing ininterbyu kung magseselebreyt pa rin sila ng Pasko sa kabila nang malaking pinsala na kanilang tinamo, siyempre naman daw. Sasalubungin pa rin nila ang Pasko na may ngiti sa labi.
Ayon pa sa babae, dumaan man daw sa kanila ang pagsubok, hindi pa rin sila makakalimot at patuloy na magsasaya kahit pa may dinanas na trahedya. Maligaya pa rin ang Pasko kahit na tinamaan ng delubyo. Walang makapipigil sa kanilang nakaugaliang pagdiriwang sa pagsilang ng mananakop.
Maligayang Pasko sa Lahat!
- Latest
