Palpak sa LTO

Ang amigo nako nga kanhi announcer sa radyo sa Sugbo ug tua na magtrabaho sa Estados Unidos nangutana kon unsay akong himoon kon ako pa’y opisyal sa Land Transportation Office (LTO) niining problema nga daghang sakyanan wala gyuy klaro nga plate numbers.

Sa walay daghang langan, gitubag nako siya pinaagi sa social media nga sayon ra kaayo ni.

Una, ang kadagkoan sa LTO ingon man ang Department of Transportation (DOTr) nasayod nga kada tuig nag-anam kadaghan ang mga sakyanan.

Dinhi lang sa Central Visayas, mga 30,000 ka bag-ong sakyanan ang madugang kada tuig, unya walay mga bag-ong karsada nga gimugna ang kagamhanan.

Unahon nato paghisgot ang kakuwang og plaka sa LTO nga ikahatag sa mga magparehistro og bag-ong mga sakyanan.

Pangutana, nganong wala man sila magpahimo og daghang plate numbers, kon nasulod man sa ilang utok, nga nagtubo ang gidaghanon sa mga sakyanan kada tuig?

Bisan sticker gani nga ipapilit sa mga plate numbers niadtong mga narenyohan og rehistro, usahay mahutdan sila, apan gipabayad ang motorista.

Husto ba gud na? Kaniadto, nangolekta sila og bayad kay ang mga daan nga plaka ilisan kuno og bag-o, gikan sa green ngadto sa black nga plate numbers, apan wala gyud moabot ang ubay-ubay’ng plaka.

* * *

Ang labing dako nga opisyal sa LTO angay nga mohimo og mga pamaagi aron nga masulbad na ang problema sa kakuwang ug mga plaka ug stickers.

Unfair kaayo kay ang motorista nagbayad pagparehistro sa sakyanan apan wala nila hatagi og plate numbers.

Unya ra ba, dunay ubang opisyal sa LTO nga mohatag og sayop nga numero sa plaka ngadto sa mga motorista.  Gikuyawan ko nga kon may aksidente nga maglambigit niining maong mga sakyanan, dili mahibaw-an ang mga nakahimo og disgrasya.

Mahibaw-an ba gud nimo dayon kon kinsa ang tag-iya sa sakyanan nga dunay plaka nga 070106; 070105, 020102 ug uban pa nga susama niana?

Ang kadagkoan sa DOTr ug Department of Public Works and Highways (DPWH) angay’ng magmiting ug mangita sila og paagi nga makamugna og dugang mga karsada aron pagsulbad sa problema sa trapiko.

Dako na kaayo ang bayranan karon sa rehistro sa sakyanan kay gidoble ang kantidad niini pipila ka tuig na ang nakalabay isip Road Users Tax.

Sa ato pa, angay’ng ang Road Users Tax gastohon ni sa paghimo og dugang mga karsada, ug pag-ayo sa mga karsada,

Unya, ang LTO ug LTFRB angay’ng mohingusog sa kampanya nga dili na padaganon ang mga dunot na nga sakyanan, ilabi na ang mga wala na marehistro kay wala kini katungod nga modagan sa karsada.