EDITORYAL - Maguindanao massacre

Karong adlawa may mapaabot kahang hustisya ang 58 ka mga tawong biktima sa gibansagang Maguindanao massacre nga diin gikamatay sa 32 ka mga sakop sa media?

Naabtan gyud og napulo ka tuig o usa ka dekada ug sa kataposan mabasahan na sa hukom ang mga suspetsado pinangulohan ni kanhi gobernador Zaldy Ampatuan.

Ang maong masaker maoy gibansagan nga “world’s worst mass killings of journalists.” Ang mga suspek misuway pa unta sa pagtago sa krimeng ilang gihimo pinaagi sa paglubong sa mga biktima ug sa ilang mga sakyanan.

Ang convoy ni kaniadto gubernatorial candidate Esmael Mangudadatu (wa siya mokuyog) pinangulohan sa iyang asawa padung unta sa Commission on Elections office sa Shariff Aguak, Maguindanao aron moduso sa iyang certificate of candidacy sa dihang gibabagan sa mga armadong lalaki ug gipamatay.

Apil sa mga namatay ang mga igsuong babaye ug ubang kabanay ni Mangudadatu. Ang mga sakop sa media nisunod sa convoy aron unta mo-cover sa balita tungod kay init ang panaribal nilang Mangudadatu ug sa mga Ampatuan.

Silang Zaldy Ampatuan ug Datu Andal “Unsay” Ampatuan Jr. nga mga kaalyado ni kanhi presidente Gloria Macapagal Arroyo mao ang nagunang suspek sa maong masaker.

Samtang laing suspek nga si Datu Sajid Islam Ampatuan kinsa nakapiyansa niadtong tuig 2015 mao na karon ang mayor sa Shariff Saydona Mustapha.

Ang kapolisan mipasaka og kaso batok sa 197 ka mga suspek, lakip na ang 15 ka sakop sa pamilyang Ampatuan. Apan 80 sa mga gikasohan wala pa nangadakpan.

Naabtan pa og usa ka dekada una pa kun mahinayon karong adlawa, mabasahan sa hukom ang mga mamumuno.

Usa kini sa mga kasong dili daling makalimtan sa media sa tibuok kalibotan nga sa usa lang ka pamilok daghang mga kauban niini sa industriya ang gipamatay mao nga gibansagan ang Pilipinas nga “Most dangerous country for journalist.”