Don’t english me, says DepEd?

Buot ni Gob. Gwen Garcia nga dili ipa-imlementar ang Mother Tongue-Based Multi-Lingual Education (MTB-MLE) Program sa DepEd kon dili ang Iningles nga pinulongan lang gayod ang gamiton nga medium sa pagtudlo diha sa mga publikong tulonghaan sa lalawigan sa Sugbo. Kon ipatuman gayod sa DepEd ang multi-lingual education program, alegre tingale paminawon ug sud-ongon ang saring kon lain-lain ang pinulongan sa kabataan nga daw nagkalain-lain nga langgam sulod sa hawla. Husto ang gobernador. Inay magkasinabot, maglibog na hinuon og samot. Saoonz!

Mag-inom na man daan

Mipahinumdom ang Civil Service Commission nga segun sa CSC Resolution nga giluwatan niadtong 2011, ang mga empleyado sa gobyerno giawhag nga mopahigayon lamang gayud og mga yano nga Christmas party. Ang maong resolution nagdili usab sa mga empleyado pag-inom ug ilimnon nga makahubog atol sa maong kasaulogan. Buotan man kuno ang mga empleyado sa gobyerno.

Agi og pagtuman sa maong kamando-an sa CSC, moinom na lang sila daan sa dili pa magsugod ang hudyaka. Hubog na daan inig tambong sa party. Pagkamarokoy na man gyud!

Buhisan usab ang tawo’ng plastic

Mipadayag ang DENR sa ilang suporta nga buhisan ang paggamit sa plastic isip shopping bag sa tumong nga mamenosan ang problema sa polusyon.  Apan misugyot ang DENR nga inay por kilo ang pagbuhis, himoon kini nga matag piraso.

Kay dili man kapugngan ang paggamit sa plastic, bisan pa man sa balaod nga nagdili niini, nakahukom ang gobyerno nga buhisan na lang hinuon kini.

Wala pa matino kon apil ba nga buhisan kadtong mga tawo nga plastik og kinaiya.  Hinaut pa unta nga maapil!

Dili na karne, seafoods na

Mipagawas og laing kamandoan si Gov. Gwen Garcia pinaagi sa usa ka Executive Order nga nagdili pagpasulod sa mga baboy, lakip na ang ubang mga pork-related products, nga nagagikan sa Eastern Visayas, nunot sa hiningusgang kampanya sa Capitol batok sa African Swine Fever.

Bisan niini, maglaum kita nga aduna gihapo’y mga negosyante nga mopalusot.

Nakapahinumdom kini sa estoryang  bahin sa usa ka Muslim nga ganahan gayud nga mokaon og baboy bisan gidili sa ilang tinuohan.

Busa gitambog niya ang baboy sa dagat ug dayon gidakop pagbalik pinaagi sa pukot (fish net), dayon gihinganlan kini niya ug “SEAFOODS.”  Brayt sa palusot ang tawo!

Mapahiyomon nga opisyal

Gikataho nga ang si South Korean President Moon Jae-in mitudlo sa usa ka kanhi Parliamentary Speaker nga si Ching Sye-kun isip ilang Primero Ministro.

Gihulagway nga dili maantigo masuko si Ching Sye-kun mao nga gibunyagan siya sa angga nga “MR. SMILE.” Dili man usab malabwan ang atong nasud.

Kon adunay mapahiyumon nga primero ministro ang South Korea, aduna man usab kita’y mapahiyomon nga bise presidente.

Ambot lang kaha kon pareha ba silang duha sa kinaiya ug katakos.  Di ko sure!