Talaan sa mga kaliwatan

Kagahapon alang niadtong nanimba sa Misa de Gallo ang inyong nadungog nga ebanghelyo naghisgot man og daghang mga pangalan.

Mga pangalan kadto sa mga kaliwatan sa atong Ginoo. Dunay tulo ka mga hut-ong.

Gikan kang Abraham ngadto sa Pagkabihag. Laing hut-ong gikan sa pagkabihag ngadto sa laing pagkabihag ug laing hut-ong gikan sa pagkabihag hangtud nga natawo na ang Mesiyas kun ang dinihogan. Kun atong tan-awon dili tanang nahinganlan limpiyo og kinabuhi.

Ang uban kanila dunay apan. Si David pa lang daan ang nabantog nga hari sa Israel ang nadani sa usa ka babaye nga tungod niini iyang gipangitaan og paagi ang kamatayon sa bana niini. Si Tamar nagnamkon pinaagi sa iyang ugangan, Si Rahab usa ka dautang babaye.

Si Solomon nga bisan kun maalamon nga Hari ang nitugot nga ang iyang asawa nga mga langyaw magdala man og mga diosdios mismo sa nasud sa Israel.

Sa ato pa, nahimong daw sa nahugyaw ang maong kasinatian nilang tanan.

Apan bisan pa niini ang Dos padayong nihatag sa pagsalig ngadto sa katawhan nga tungod niini Iyang gimbut-an nga ang iyang bugtong anak ang ipahimugso ning maong matang sa kaliwatan.

Nahimo siyang usa kanato diha gyud sa atong kahuyangan.

Aron diha sa iyang pag-ambit sa atong pagkatawhanon kita pud unta ang makaambit sa iyang pagka Diosnon. Ingon ini ang kahulogan kun maghisgot kita sa Mystery of Incarnation.

Sa laing bahin ang maong sanglitanan sa atong ebanghelyo nipahinumdom kanato ning mosunod:

1. Ang Pasko sa pagkatawo sa Ginoo usa ka timailhan nga ang bili sa matag kasaulogan kinahanglang motapos gyud diha sa kalambigitan.

2. Ang maong kalambigitan nagpahinumdom sa matag usa kanato nga haw-ang ang kinabuhi kun ugaling wala ang tinguha nga makiglambigit sa atong isigkaingon.

3. Ang atong Ginoo gipahimugso sa pasongan pahinumdom kini nga diha sa pakiglambigit kinahanglanon gyud nato ang babad nga pakighimamat sa usag usa.

Walay ikahulip sa pisikal nga presensiya ug walay mas tam-is pa kun anhi kita magsugod sa tugkaran sa tawhanong kalambigitan nga gilig-on diha sa paghigugma.

Kay matud pa sa ebanghelyo ni Juan. “Gipadala sa Dios ang iyang bugtong Anak nganhi sa Kalibutan aron si kinsa kadtong motuo kaniya dili mamataykondili makabaton nuon sa kinabuhing way katapusan! (Jn. 3;16) Ang hinungdan: Tungod sa dakong gugma sa Dios alang kanato!