Pinindeho ni Misis
(Huling bahagi)
MATAPOS mapakinggan ang reklamo ni AA at maipadala ng OCA ang kaso sa huwes at mapag-aralan lahat ng ebidensiya lalo ang mga litrato sa camera na huli ang kakaibang pagtitinginan nina BB at EE, gumawa ng rekomendasyon ang OCA para tanggalin sa trabaho ang dalawa dahil sa imoralidad. Kinatigan ng Supreme Court ang rekomendasyon at pasya ng huwes. Sapat ang ebidensiyang ipinakita ni AA para patunayan na nakipagrelasyon ang asawa kay EE.
Nakatulong din ang mga litratong ipinakita ni AA para tumibay ang kanyang paratang at pinasinungalingan din ng mga litrato ang palusot ni BB na magkaibigan lang sila ni EE. Walang pag-aalinlangan na may relasyon sila at lumabag sa panuntunan ng moralidad ng ating lipunan.
Ayon pa sa SC, dapat maging ehemplo ng integridad, katapatan at katinuan ang mga empleyado nito. Tulad ng ibang kawani ng gobyerno, dapat magpakita sila ng pinakamataas na respeto sa moralidad, integridad at katapatan sa lipunan hindi lang sa pagtupad ng kanilang tungkulin kundi pati sa kanilang personal na buhay at sa pribado nilang transaksiyon sa ibang tao. Pangalagaan dapat nila ang pangalan at katayuan ng korte dahil nasasalamin sa kanilang opisyal at personal na kilos ang hudikaturang pinagsisilbihan.
Ayon sa Rule IV, Uniform Rules on Administrative Cases in the Civil Service, ang kahiya-hiyang kilos at immoral na gawain ay inihahanay sa grave offense na ang parusa ay pagkatanggal sa trabaho. Pero dahil ito pa lang ang unang kasalanan ni BB, hindi akma ang rekomendasyon na tanggalin agad siya.
Ayon sa batas, maaaring suspendihin muna siya ng 6 na buwan at 1 araw. Tungkol naman kay EE, dapat ibasura na ang kaso dahil sa kawalan ng kapangyarihan na sakupin pa siya ng OCA. Tutal, nasibak na siya at natanggal sa listahan ng mga Sheriff dahil hindi na pumapasok sa trabaho noong panahon na isinampa ang kasong administratibo laban sa kanya (Gibas, Jr. vs. Gibas and Lintao, A.M. P-09 2651, March 23, 2011).
- Latest
