Mental health

Gikondenar ug gipanghimaraut ang usa ka inahan nga nanagmal og tindera sulod sa mall sa dakbayan sa Sugbo.

Kung makapatay ang pagtunglo pinaagi sa social media hagbay ra unta kining bayhana naputlan sa ginhawa.

Dili sad ta kabasol sa mga tawo nga makisimpatiya sa tindera nga nasamdan ang nawong human labaya og gahi nga butang sa suspek.

Kung tan-awon gyud sa video mosurok ang atong dugo sa kalagot tungod sa ka mapahitas-on kon manulti nga murag si kinsang milyonarha.

Matud pa sa uban nga nakaasawa lang og Hapon “Donyatic monster” na kaayo maong gamay ang iyang pagtan-aw sa uban.

Apan dihang nakita nako ang babaye sulod sa prisohan kay akong interviewhon gibati man ko og kaluoy sa iyang kondisyon.

Niwang ug nagsige og duot sa iyang tiyan nga dunay gipamati sa lawas o dili gyud normal ang iyang lihok.

Naobserbahan nako nga naa gyuy lahi sa iyang pagkatawo o panglawas nga kinahanglan tutokan sa iyang pamilya.

Angayan usab luagan sa uban ang ilang panghunahuna aron makasabot sa posibleng giagian niining bayhana.

Bag-o lang siyang nanganak ug posible kaha nga naay post-partum depression ang suspek.

Posible sad nga naa na gyud siyay gihambin nga suliran kay kun wala siyay problema dili niya mabuhat ang nalambigitan nga eskandalo.

Ang kampo sa suspek mipadayag nga ila kining ipaubos sa psychiatric evaluation ug ipasulod sa mental health facility.

Dili layo kini nga maoy nasinati niining bayhana nga kinahanglan og professional help kay kun dili mosamot gyud ang problema.

Tinood nga angayan niyang bayran ang iyang salaod apan mas maayong aksyonan usab ang iyang kahimtang.

Kini ang angayang himoon sa katawhan ilabi na sa iyang pamilya aron dili na masubli pa ang gihimo niini.

Usahay gibaliwala lang gyud sa uban ang isyu sa mental health apan kini ang mahinungdanon sa tanan kay dili mo function ang atong pagkatawo kon mawala ang atoong normal nga dagan sa pangisip.