Mi-level na

Nasayop ko sa akong pangagpas sa niaging semana nga hangak na alang sa Pilipinas nga masubli pa ang nakab-ot nga overall championship nga nahimo niini sa Southeast Asian Games kaniadtong 2025 dinhi sa nasud.

Kay sa niining kasamtangang SEA Games nga gipahigayon usab dinhi sa Pilipinas, misulbong dayon sa unang pwesto ang nasud sa 11 ka nasud nga nagtigi sa kompetisyon. Kagahapon, subra na sa 90 ka medalyang bulawan ang nakuha niini.

Sukad pa sa unang adlaw, dali nga miarangkada ang Pilipinas sa kompetisyon ug mihakot dayon og daghang bulawan. Hangtud nga wala na gyud milingi pa ang nasud ug padayong misulbong sa mga duwa.

Karon, komportable na ang Pilipinas nga nagtungtong sa unang puwesto gumikan lagi kay layo na kaayo ang gintang sa Indonesia, nga anaa sa ikaduhang puwesto, nga nakasungkit lamang og 50 ka bulawan. Ug hayan nga mogula gayud nga overall champion ang nasud.

Angay lamang nga hatagan og dakong pasidungog sa kagamhanan ang atong mga atleta tungod sa ilang dakong nakab-ot sa 30th SEA Games. Dili tiaw ang kahago ug pressure nga ilang gisagubang pagsungkit og mga medalya.

Dako kini nga achievement sa atong mga atleta nga pagpasabot lamang nga world-class ang ilang preparasyon sa maong kompetisyon. Kini taliwala sa mga dagkong kontrobersiya nga naglikos sa pag-host sa Pilipinas sa maong biennial meet.

Nagpasabot lamang usab kini nga wala maapektohi ang atong mga atleta sa padayong politikanhong kagubot tali sa administrasyon ug oposisyon nga kamulo karon og hinapakay og lapok, ilabina mahitungod sa pag-host sa nasud sa SEA Games.

Niining maayong performance sa atong mga atleta, dakong garbo kanato ang magsud-ong nga sa katapusan, mi-level up na ang Pilipinas sa mga international nga competition. Manghinaut lamang kita nga ma-maintain sa nasud ang supremacy niini sa paugnat sa kusog sa rehiyon.