Napaghandaan si Tisoy
ANG Bagyong Tisoy ang pinakamalakas na bagyong tumama sa bansa ngayong taon na ikinamatay ng 17 katao. Nanalasa ito sa Bicol, Quezon, Marinduque, Mindoro provinces, Romblon, Batangas at Laguna. Maraming bahay ang nawasak. Maraming pananim ang nasira. Hanggang sa kasalukuyan, wala pang kuryente sa mga sinalantang lugar.
Sa Metro Manila, nakaranas ng malakas na ulan pero hindi ito tumagal. Isinara ang Ninoy Aquino International Airport (NAIA) ng 12 oras. Maraming flight ang kanselado dahil sa bagyo. Hindi pinayagang lumayag ng Philippine Coast Guard ang anumang barko. Mabuti at natuto na rin ang marami. Marami ang sumunod sa paglikas ng gobyerno sa mga naninirahan malapit sa baybayin. Napaghandaan kahit papaano. Walang may gustong maulit ang naganap noong Yolanda.
Nalagyan nang maraming tubig ang Angat Dam dahil sa Bagyong Tisoy. Mabuti naman. Nakansela naman ang ilang laro dahil sa bagyo. Walang pasok para sa karamihan sa Metro Manila at ibang karatig na lugar. Bagama’t handa na raw lahat para sa bagyo, mabuti na rin ang maingat, at bisita natin ang lahat ng delegasyon mula sa iba’t ibang bansa. Masasabi na rin nila na nakaranas sila ng bagyo sa Pilipinas, bukod sa iba’t ibang karanasan at alaalang nakukuha nila habang nasa bansa. May kumain kaya ng balut, kung may hinanda? Nakasakay kaya ng tricycle? Sinubukan kaya ang MRT?
Sana ay ito na ang huling bagyo para sa 2019. Malapit na ang selebrasyon ng Pasko na kilalang pinakamahaba sa mundo. Lumamig lang sana ang panahon na walang dalang ulan o malakas na hangin, para dagdag na rin iyan sa kapaligiran ng panahon.
- Latest