Inutil sa pagpanlingla
Kay si bisan kinsa man ang makabutang og bisan unsang kasayuran sa social media, nga wa magkinahanglan og bisan unsang pagtugot, imposible ang pagsusi sa katinuod sa tanang gimantala. Bisan ang higanteng mga kompaniya sama sa Facebook, Google ug Twitter way katakos sa pag-ag-ag sa tanang manggawas sa ilang mga plataporma.
Di sab mahimong usbon ang ilang lagda. Nga kinahanglang mananghid una mamantala ang post. Kay ambot unsaon pagsubli ang binilyon ka posts matag gutlo.
Kon tangtangon ang kagawasan pag-post og bisan unsa, ambot pila nay lay mahibilin sa ilang plataporma.
* * *
Imposible sab ang pagsubli sa tanang posts sa Facebook, YouTube ug Twitter kon nakatuman ba sa batakang mga lagda sa kamatinud-anon ug kamakiangayon.
Bisan sa kadaghan sa ilang mga inhinyero ug kabag-o sa mga teknolohiya, di silang kaato sa pagbadlong ug pagpapas sa tanang balikas, binastos, pangilad, panghudlat ug pagpanamastamas sa tanang pinulongan sa kalibotan sa tanang gutlo sa tibuok adlaw ug sa tibuok gabii.
Maong nidangop ang higanteng mga kompaniya sa naandang lusot nga gawasnon ang ilang plataporma ug di silang kapatuman og mga lagda nga molugpit sa kagawasan sa pagpadayag.
* * *
Sama sa mga nagmugna sa internet, nagtuo gyod tingali ang mga tigpasiugda sa social media nga kon hatagan og kahigayonan ang katawhan sa kanasuran sa gawasnong pagbinayloay og kasayuran ug mga panghunahuna molambo ang pagsinabtanay ug panaghiusa.
Wa gyoy nagtuo nga ang ilang mga plataporma mao na karoy labing seryusong hulga sa demokratikanhong mga institusyon sa gawasnong mga nasud ug labing gamhanang kahimanan sa mga diktadura pagsangyaw sa ilang pamakak ug paukyab.
* * *
Maong sa sunod higayon nga makabasa ka og fake news sa social media nga nag-viral kay gipatuyangan og like ug share sa imong mga kaila, o kon ikaw mismo mahinayak og like ug share ug abiba sa kasayuran nga dako diayng bakak, mahimo ra gyod kang managuto nga wa tay mahimong mga duwende pagbadlong sa suliran nga wa masulbad sa mga higante.
Apan magngutngot sang atong tanlag kon igo na lang mopaundayon. Tingali tinuod ang sulti nga gagmay ray makapuling.
Tingali ang atong kagamay, kon gamitong alas sa panaghiusa, mao ray makabaraw ning binuang sa mga dagko.
* * *
- Latest
