Sako ug van

“Naay tagawog/tagalog nga manakop og bata, isulod sa sako.” Mao ni panghadlok sa mga ginikanan didto sa probinsiya kaniadto aron mabadlong ang pagpunay og la-ag sa ilang mga anak. Tungod kay way electronic gadgets niadto, ang kalingawan sa mga bata mao ang pagsum-ok sa kakahuyan panahon sa udto aron sa pagpangita og kaka ug pagpamayabas.

Lisud mabadlong ang mga bata, bisan unsa-on og dagmal sa ginikanan molighot gyud. Bugtong makapugong nila sa paglaag mao ang paghadlok nga sila dagiton ug isulod sa sako.

Ang maong kasinatian didto sa bukid nakapahinumdom nako sa mga mikatap nga estorya karon diha sa social media mahitungod sa puti ug itom nga van nga gisakyan kuno sa mga tawo nga managit og bata. Niasenso na hinuon ang ang estorya, kaniadto sako apan karon van na maoy gidala sa mga kidnappers.

Managlahi na hinuon ang motibo niadto ug niining panahon sa kabag-ohan. Apan usa ka butang ang  siguro, pulos peke ug produkto lang sa imahinasyon ang maong mga estorya. Apan tungod kay moderno na ang panahon ug labihan nalang ka sayon sa pagpadangat sa impormasyon, mikuyanap nga daw sama sa dakong da-ob ang maong peke nga kasayuran.

Dili ka’ng kabasol sa mga tawo nga nahimong instrumento sa pagkaylap niini tungod kay resulta lang pud kini sa ilang kahingawa ug sa tinguha nga mapahimangnoan ang ilang mga higala ug membro sa pamilya.

Apan hinaut nakakat-on tang tanan og leksiyon niini. Alang sa publiko nga mitugot sa ilang kaugalingon nga mamahimong kabahin sa pagkatap sa mini nga kasayuran, hinaut nga sa sunod higayon inyong pili-on ang mga balita sa dili pa ipasa diha sa social media.

Siguroa nga gikan sa mga lihitimo ug kasaligan nga mga tigbalita ang inyong kasayuran sa dili pa ipasa. Ug alang sa nagmugna sa sayop nga impormasyon, hinaut maleksiyon ka sa kasong imong atubangon.

Ang hepe sa kapolisan sa dakbayan sa Danao nga si Maribel Getigan mipahibawo nga ilang ikiha og “alarm and scandal” ang 21-anyos nga tinun-an nga unang nagpakatap sa kasayuran nga gisuwayan siya og dagit sa mga tawo nga nagsakay og van.

Human ipatawag sa kapolisan alang sa imbistigasyon, miangkon ang tinun-an nga imbento ra niya ang maong kasayuran aron pagsakay sa uso. Sa ato pa dili tinuod nga dunay nga lalaki nga nagsakay og van nga misuway niya pagdagit. Hinaut tinud-on sa kapolisan ang pagkiha sa maong batan-on aron pagtudlo sa publiko nga mamahimong responsabli sa mga kasayuran nga ilang ipahibawo diha sa social media.