Kaluwasan sa mga tinun-an

Usa sa mga atangan sa mga ginikanan ug mga tinon-an apil na sa mga magtutudlo sa panahon nga adunay bagyo mao ang announcement sa pagkanselar sa klase aron dili mahinayak og adto sa mga tunghaan.

Crucial kini kaayo kay gawas nga makahasol mabutang pa gyud sa peligro ang kinabuhi sa mga bata.

Ang dakbayan sa Sugbo, mideklarar si Mayor Edgardo Labella nga suspensohon ang klase sa pres school, elementary ug high school bisan og signal number 1 lang ang Metro Cebu.

Gipasabot ni Labella nga apil ang high school kay dunay mga eskwelahan sa mga bukirang baranggay nga delikado sa landslide.

Ingon usab niini ang gihimo sa dakbayan sa Talisay, Lapu-Lapu ug mismo sa lalawigan sa Sugbo gideklarar usab ni Governor Gwen Garcia.

Apan adunay daghan nagbagolbol sa dakbayan sa Mandaue niadtong Lunes kay wala man gyud modeklarar sa cancellation of classes.

Ang information officer sa dakbayan ang miingon nga ang DepEd ang angayan mo anunsyo niini.

Apan ambot kun nasipyat ba ang naasoyng opisyal nga ang lokal nga kagamhanan ang modeklarar gyud kun dunay suspension sa klase panahon kun adunay katalagman.

Ambot usab kon naa ba si Mayor Jonas Cortes niadtong Lunes kay kon naa siya unta siya gyud ang nakadeklarar sa kanselasyon sa klase.

Crucial kaayo kadtong panahona alang sa mga bata kay kinabuhi nila ang nakataya niadtong tungora.

Hinoon sa sunod adlaw nakadeklarar ang ang Mandaue City sa pagsuspenso sa klase basin seguro napaminaw nila ang sentimento sa publiko.

Sa mga ginikanan automatic na usab nga dili paeskwelahon ang mga anak kon sa tan-aw nga delikado ang sitwasyon tungod kay nagdaut ang panahon.

Bahala na og dili modeklarar ang lgu o deped basta ang dunay labawng katungod sa pagsuspenso sa klase ang mga ginikanan.

Ang mahinungdanon nga luwas ang mga bata sa panahon nga naay ingon niini hulga sa kinaiyahan.