Pagbantay ni Tisoy
Dayong sud niya sa nasud (gabii o sayo karong buntag), ang bagyong Tisoy tungod sa binirahay sa Amihan ug ubang sistema mahimo pang mahiagom sa mosunod nga kausaban:
Ang iyang direksiyon paingon sa Bicol, Central Luzon ug Metro Manila nga maoy nahimutangan sa kasagaran sa venues sa nagpadayon nga 30th Southeast Asian (SEA) Games mahimong mo-us-os paingon sa Samar o mahimo ganing moigo sa amihanang Sugbo; ug
Ang gikusgon sa iyang hangin mahimong kutob lang sa 200 ka kilometro matag takna o mas mobangis pa ug mahimo gyong supertyphoon.
* * *
Apan bisan unsa pay iyang agianan ug kataposang hunat, ang bagyong Tisoy gitino na nga:
Mosablig gyod og uwan sa Sugbo ug ubang bahin sa Kabisay-an tungod sa kalapad sa 500 ka kilometro niyang langyab; ug
Mahimong kinakusgan nga bagyo nga nakasud sa Philippine Area of Responsibility (PAR) karong tuiga nga gikabalak-an gani nga sama kapintas sa bagyong Reming niadtong Disyembre 2006 ug bagyong Glenda niadtong Hulyo 2014.
* * *
Gipasidan-an sa PAGASA ang lokal nga mga opisyal sa Luzon nga mangandam nang daan kay mahimong maigo pag-usab ang samang mga dapit nga gigusbat sa nahaunang duha ka gamhanang bagyo:
Si Reming nga may hangin nga 190 ka kilometro matag takna ngadto sa 225 ka kilometro matag takna nipatay og 734, niangol og 2,360 ug nigusbat og P6 bilyones nga balor sa kabtangan ug umahan; ug
Si Glenda nga may hangin nga 140 ngadto sa 170 ka kilometro matag takna nipatay og 106, niangol og 1,260 ug niguba og mga umahan ug kabtangan nga balor og P38.6 bilyones.
* * *
Ang hangin sa bagyong Tisoy nga mahiagoman sa Luzon makaibot og mga punoan sa kahoy, mga poste sa suga ug mas huyang nga mga lagutmon ug ubang tanaman sa mga umahan ug makaguba sa kabalayan nga hinimo sa gaan nga mga sangkap.
Mahimong hangpon ang uwan sa bagyong Tisoy nga makatapak sa dako nga pagtidlom sa suplay sa tubig sa Sugbo. Apan di ta angayng mangiyugpos kay mahimo sang mopaawas sa mga suba ug mosangpot sa lapad nga baha nga labaw sa pagbara sa trapiko makahulga pa gyod sa mga kinabuhi, kabalayan ug kabtangan.
* * *
- Latest
