Si Drilon ang sisihin - Rep. Mikee Romero
Para kay 1-Pacman party list Cong. Mikee Romero, si Senate Minority Leader Franklin Drilon ang dapat sisihin sa pagkaantala ng preparasyon ng 30th SEA Games. Oo nga naman. Si Drilon ang tumapyas ng P2-Bilyon sa pondong gagamitin sana sa SEA Games na umaabot sa P9.5-B sa deliberasyon ng Senado sa 2019 National Budget.
Noong Mayo lamang naipalabas ang pondo para sa SEAG. Naantala ito nang apat na buwan dahil sa iringan ng kongreso at senado tungkol sa pork issue. Marami na sanang nagawa ang organizers tulad ng konstruksyon sa mga SEAG venues, paghahanda sa pagkain at kung anu-ano pa kung naaprobahan sa takdang oras ang budget. Dapat ding sumunod ang mga organizers sa mga bidding at procurement process ng DBM. Ewan ko kung ano ang intensyon ng Senate Minority Leader.
Ininsulto pa ni Drilon ang Obra ng national artist na si Miñoza na lumikha ng cauldron ng SEA Games sa New Clark City. Tinawag niya itong “kaldero”. Kinuwestyon niya ang P45-M na ginugol sa istruktura na magsisilbing pailaw hanggang matapos ang sports event. Halatang pinupulitika ni Drilon ang isang mahalagang pandaigdig na torneo na magbibigay ng karangalan sa ating bansa, aakit ng mga turista na magpapasok ng revenue sa bansa at higit sa lahat, maglalagay sa Pilipinas sa mapa ng pandaigdig na pagkilala.
Ang mga atleta ang nababalahura sa mga pinakawalan niyang akusasyon dahil ang cauldron ay ang pangkabuuang simbolo ng tapang, gilas, puso at tatag ng atletang Pilipino. Sa halip na batikusin, ‘di ba dapat ay nagbigay ng tapik sa balikat si Drilon sa mga atletang Pilipino?
At dahil sa pagpapakawala niya ng mga akusasyon, ‘di ba nga’t na-fake news at nakuryente pa si Drilon nang akusahan niya si BCDA President Vince Dizon na manugang ni Miñoza na siyang nagdisenyo sa cauldron. Ayun, karaka-rakang nag-sorry kay Dizon si Drilon.
Sabihin na nating may mga aberya sa pagkain, transportasyon at accomodation na nararanasan din ng mga atletang Pinoy kapag sumasabak sila sa mga international competition sa ibang bansa, daragdagan mo pa ba ng paghila pababa sa kapwa mo Pinoy?
Sana naman, magkaisa ang mga Pilipino habang idinaraos ang palaro at tigilan muna ang mga puna at batikos.
- Latest
