EDITORYAL - Senior citizens patrabah uon

Usa ka maayong inisyatiba kining pagpatrabaho og balik niadtong mga senior citizens nga may igo pang kusog aron sab sila mokita og kwarta inay nga magtuk-ong nalang sa ilang mga panimalay ug magpaabot sa pagsawop sa adlaw.

Ang Probinsiyano Partylist ni Ronnie Ong nakigalayon sa Department of Labor and Employment, lungsod sa Tuburan ug Cebu Technological-Tuburan alang sa maong tinguha, ang work-for-pay program para sa mga senior citizens. Kun buot hunahunaon, daghan pang mga senior citizens ang gustong motrabaho kay silay nakahibalo nga kaya pa sa ilang lawas. Apan gumikan sa pangidaron usahay ang mga kompanya o mga establisamento magduhaduha pag-hire kanila.

Gawas nalang tingali sa mga nakapamundar sa bata pa sila, dunay daghang senior citizens, ang uban gani nga professional gyud ang karon nagpatid-patid nalang og lata ug nagpaabot og financial assistance gikan sa LGU ug hatag-hatag gikan sa ilang mga anak kun duna may ikatunol.

Apan ang mas daghan, wala gyuy kwarta. Mao nga bisan gani ipalit sa ilang maintenance medicine ug bisan nalang kwarta ipalit og haplas ilaha pang pangayoon gikan sa ilang mga anak o sa ubang tawo.

Sakit kaayong hunahunaon nga sila kaniadtong kusgan pa, sila maoy nagbuhi ug nagpadako sa ilang mga anak ug gani bisan sa anak sa ilang mga kadugo nga way ikasarang, apan karon ang uban kanila wala na gani lingia pagbalik  sa ilang gimatuto.

Ang grupo ni Ong nitutok karon sa pagpangita og nagkadaiyang mga institusyon aron hangyuon sila nga modawat og mga empleyadong senior citizens. Sweldohan sila parehas sa ubang empleyado apan gamay lang ang buhis nga ilang bayran.

Ang mas labing maayo pa gani niini, ang mga establisamentong modawat og empleyadong senior citizens ug persons with disabilities angay hatagan og tax incentives o gamay nga pabor sa balayrunon sa buhis.

Ning paagiha, daghang mga establsamento ang ganahang mo-hire og mga senior citizens ug PWDs, gawas nga nakatabang sila sa maong sektor nindot sab sa pamati sa negosyante nga duna kini pagpakabana sa kahimtang sa ubang nanginahanglan.