Kauwaw sa SEAG

Sa Nobiyembre 30 pa ang opening sa 30th Southeast Asian Games apan naputos na kini sa kontrobersya. Wala pa gani nakasikad bun-og na kaayo dili ang mga organizer apan kita mismo nga Filipino.

Pastilan dili malimod nga grabeng kauwawan sa international scene ang mga kapalpakan gikan na sa paghiabot sa mga atleta, pagkaon, wala mahuman nga mga pasilidad ug uban pa.

Sagdan nalang unta nato nga ang mga deligado sa langyawng kanasoran ang mopakauwaw kay sila man ang nakasinati apan ang mas nakaparat kay apil man ang mga Pinoy ang mipaak usab sa kaugalingon nato.

Hinoon dili nato mabasol ang mga atletang Pinoy nga mopadayag sa ilang kasagmuyo nga wala sila matarong sa pag timan kay sila man usab ang maapektohan.

Pero giagi unta nila sa sakto nga forum ug dili sa social media sama sa sikat kaayong isyu sa “Kikiam” nga maoy gidalit kanila apan manok diay kadto.

Bitaw hilabihan ka pagpanaway ang mga tawo sa kapalpakan, yes tinood man apan wala nato ma-realize nga pagpabuhagay nato sa social media sa mga negatibong komento kita ra usab ang nauwawan tungod kay kita mga Pinoy Nagpuyo sa Pinas diin gipahigayon ang SEA GAMES 2019.

Sa gipadayag ni Senate President Tito Sotto nga hilabihan ra kaayo nato ka hospitable sa mga foreign athletes nga nakalimtan nato nga duna tay kaugalingong atleta nga suportahan ug angayan nga tutokan.

Bahala na na sila nga mangita sa ilang mga tinubdan aron makaangkon sila og haruhay nga kahimtang kay sa magpa impress ta nila nga atimanon gyud kaayo kay mahadlok ta nga madaut ang imahen.

Ang isyu dili ang pag atiman sa mga atleta sa ubang nasod kon dili ang pagdaug nato og mga medalya.

Kini unta ang atong tutokan ang pagsuporta sa kaugalingon natong mga atleta ug labaw sa tanan depensahan nato ang atong nasod sa kauwawan kay samotan nato og pagpakauwaw.

Kadtong isyu sa kaldero, kurapsyon, palpak ug uban pa ayha nalang unta na tukion inig human na sa kalihokan.

Ang kauwawan nga nahitabo karon makapa low morale baya sa mga atleta nga mosangpot unya sa kaparotan nila nga maghatod sa mas makauuwaw nga kahimtang.