Dili Gihapon mo-eskwela

Human kalagda-i ni Cebu City Mayor Edgar Labella ang ordinansa nga nagmando sa paghatag og libreng uniporme ug mga school supplies ngadto sa mga tinun-an sa publikong tulonghaan, midason ang Mayor nga wa na’y rason ang mga ginikanan nga dili mopa-eskwela sa ilang mga kabataan.  Dako na unta kining alibyo sa palas-anon sa mga ginikanan apan dili gihapon maseguro nga makatungha ang kabataan sa eskwelahan. Ang problema: gawas nga wala pa’y pamahaw ang bata, wala pud siya’y bawon ug pamilite. Dili pa hingpit ang hinabang!

Lihay sa serbisyo?

Misugyot ang OIC sa Cebu City Police Office ngadto sa Sinulog Foundation, Inc. nga dili lang unta mopahigayon og mga kalingawan o mga konsyerto sa bisperas sa dagko nga kalihukan sa Sinulog sama sa fluvial ug foot procession aron dili kuno mahago pag-ayo ang kapolisan.  Nahimong mabulokon ug makalingaw ang Sinulog tungod niining maong matang sa mga kalingawan. Inay palambuon ang pangisip kon unsaon nga mahatag ug mapahigayon ang gikinahanglan nga serbisyo, naghuna-huna na man hinoon unsaon paglikay. Pastilan ang pulis, bantay ra jud sa kalinaw!

Kahayag Luyo Sa Dag-Om

Taliwala sa mga pagsaway, namulong si DPWH Secretary Mark Villar nga ang kinatibuk-ang epekto sa “Build, Build, Build Program” sa Duterte administration mabatyagan ra unya sa katawhan sa tuig 2020. Dugay na man nga nasinati sa katawhan ang epekto sa programa. Sa matag adlaw gibugno man sa mga motorista ug katawhan ang kahuot sa trapiko ug ang pagbaha sa mga kadalanan atol sa ting-ulan tungod sa mga nasugdan nga proyekto nga hangtud karon wala pa mahuman.  Apan sagdi na lang kay matud pa sa akong apohan, “Human sa unos, hapsay na man ang pagpamugsay”. Build pa more!

Sama ba gayod sa EJK?

Matud pa ni opposition Representative Edcel Lagman, ang pagpalagpot ni VP Robredo isip co-chairman sa ICAD nahisama ra sa Extra-Judicial Killings (EJK) diin ang mga biktima pahilomon pinaagi sa pagkutlo sa iyang kinabuhi aron kuno matabunan ang mga kahiwian nga nabuhat sa mga awtoridad.  Dili kaayo haom ang maong pagkumparar kay niining pagpalagpot sa Bise Presidente, dili ang iyang kinabuhi ang nakutlo kon dili ang mga pangandoy ug mga laraw sa oposisyon pagsakmit pagbalik sa gahum.  Naklaro ang despuga niining pamahayag ni Lagman! Pag-xure uy!

Return To Sender

Nasakpan sa Bureau of Immigration ang upat ka Tsino didto sa Ninoy Aquino International Airport nga naghupot og mga counterfeit nga Paraguayan passports.  Dali ra’ng nabuko sa BI ang ilang modus tungod kay walay usa kanila nga maantigo mosulti og Kinatsila.  Tungod niini, gipabalik dayon ang upat ka Tsino sa lugar nga ilang gigikanan . Nahisama ang upat sa sulat nga wala mahidangat sa gipadalhan kay wala kini tino nga address mao nga gi-estampahan na lang og “RETURN TO SENDER”. Hayan masabtan na nila ang kahulogan sa mga pulong nga “ENTRADA ug SALIDA”! Alegre!