Sayup nga entry sa birth certificate

Dear Atty. Divine,

Minyo ko apan nagbuwag mi sa akong bana. Human sa among panagbuwag  nakakita ko og laing karelasyon og   nag live-in mi ug nakaanak mi sa akong  ka live-in.

Ang problema kay ang nabutang nga apelyido sa akong anak mao ang apelyido sa akong ex-husband lakip na ang  entry sa name sa father sa iyang birth certificate mao ang name sa akong unang bana. Nahitabo ni kay after sa akong pagpanganak na admit ko kay misaka ang akong BP, so ang nag process sa birth certificate sa bata mao ang hilot nga maoy nagpaanak nako ug ang akong amiga.

Wa ko kahibawo nga ang apelyido sa akong ex-husband ug iyang pangan ang gibutang sa birth certificate sa akong anak ug nahibaw an lang ni nako pagkuha nako og NSO copy. Ang akong ex-husband patay na, ug kasado mi sa amahan sa akong anak. Ang records sa akong anak sa school ang apelyido man sa iyang papa ug ang pangan sab sa iyang papa.

Ang akong pangutana kun pwede pa ba ni mausab ang iyang birth certificate? Pilay magasto ani kay apiki ra ba mi sa panalapi og mga tiguwang na sad mi? Daghang salamat.

Ason

* * *

Dear Ason,

Yes, pwede nga  ipa correction ang sayup nga entry sa birth certificate sa imong anak nga mao ang iyang apelyido ug ang pangan sa amahan pinaagi sa pagfile og Petition for Correction of Entry and Change of Surname  sa korte diin marehistro ang iyang Birth Certificate.

Kun legal age na ang imong anak, siya ang mo file sa Petition ngadto sa korte. During sa hearing, iyang pamatud-an nga sayup ang maong entry, magamit sab niya as ebidensya ang iyang school records ug ikaw mismo  isip inahan mo-testify sab ka aron sa pagprubar sa iyang allegation sa  petition. Kun wa moy budget para  sa pagkuha og abogado mamahimo mo nga  modangop sa Public Attorney’s Office kon PAO aron mao kini mo-handle sa kaso sa imong anak. Thanks and God Bless.

Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miterkules, Sabado ug Domingo.