EDITORYAL - Tawhanong clearing operation

Samtang daghan ang nalipay kay hamugaway na agian human nga gihawanan ang mga aseras ug kadalanan sa Dakbayan sa Sugbo gikan sa mga ambulant vendors, murag og daw kalit nga nakainom og pait nga tabletas ang mga tawo pagkakita sa viral video sa gibuhat sa mga clearing personnel sa usa sa mga vendor nga ilang gipapahawa sa aseras.

Kun tan-awon sa video (pwerte sab kahinay ang volume sa tingog niini), makaingon gyud ang makakita nga gimaltrato sa mga sakop sa siyudad ang maong lalaking vendor nga namupho intawon sa iyang mga baligyang nangayabo.

Ang maong viral video nakaabot na sa atensiyon sa mga opisyales sa dakbayan ug sagad sa nakakita wala gyud mopakpak sa gibuhat sa maong mga sakop sa Cebu City Prevention, Restoration, Order, Beautification, and Enhancement (PROBE).

Maayo gyud ang tumong sa paghawan sa mga aseras gikan niining mga vendors. Unya dili lang sab kini dinhi sa Sugbo gihimo tungod kay gihimo kini sa tibuok nasud subay sa mando ni Pres. Duterte.

Gawas nga nakababag sila sa sidewalks para sa mga pedestrians, nakatampo sab sila sa pagkabara sa mga basura diha sa mga kanal nga moresulta sa kanunay nga paglunop sa baha matag mobunok ang uwan.

Busa, wala gyud untay reklamo ang mga tawo kay mas daghan man ang nakabenepisyo sa kaharuhay sa aseras  kun duna man mga mireklamo kani rang mga vendors.

Apan tungod sa viral video, ang kaniadto nahimuot sa kahawan sa mga aseras nakasaway karon sa mga personnel sa PROBO.

Dili unta kalimtan niining mga tinugyanan sa gobiyerno nga samtang tuod naghimo ra sila sa ilang trabaho, dili unta nila kalimtan nga mga tawo ra sab nga nanginabuhi kining mga vendors nga ilang giabog ug dili kalikayan nga usahay bisan imong pamilya molaban sa uban nungka sa imo tungod sa dili maayong imong nabuhat.

Kun unsaon nila kini pagpaagi aron dili masilo ang katawhan sa matag operasyon,sila nalay mangita og paagi kay sila may gitahasan, basta pinasubay lang sa tawhanong pamaagi.