EDITORYAL - Vaping makapahunong ba gyud sa pagpanigarilyo?

May katarungan ang gobiyerno sa paghigpit niining paggamit sa electronic cigarettes o mas naila sa tawag nga vape. Mao kini ang gikahiligan karon sa ubang mga kabataan.

Sa sinugdanan , ang linya sa pag-promote niini mao nga usa kini ka maayong gadget para niadtong mga gusto ng mohunong sa pagpanigarilyo. Sumala pa sa mga advertisements bahin sa vape alternatibo kini sa nicotine.

Gipasiatab sa mga nagbaligya niini nga dili sama sa peligroso ang aso niini kun itandi sa aso gikan sa sigarilyo.

Gani miingon sab sila nga gamay ra kaayo ang nicotine content niini maong luwas ra para sa mga mangyupyopay.

Laing pangangkon sa mga tiggamitan ug namaligya niini, nga kadtong mga gusto ng mobiya sa pagpanigarilyo mahimong mogamit lang una og vape aron kunohay dili “makalitan.”

Apan bisan pa sa pagpangdani pipila ra man gyud sa mga tigpanigarilyo ang nibalhin sa vape tungod kay mahal kini nga gadget ug paliton pa sab ang kemikal nga sunogon niini aron moaso.

Ang labing tinuod, kadto ra gyung dunay kwarta ang makapalit og vape, kadtong mga hinigarilyo bisan gustohon man nilang mo-shift niini kun wala silay kwarta, aw padayon gihapon sila sa pagpalit og sigarilyo kay mas barato. Apan subo lang kay dunay mga batan-ong wala gyud sukad makasuway og panigarilyo, ang tiggamitan na karon og vape kay maoy “uso.”

Unsa may kaayohang makuha nila niini? Karon duna nay mga nangamatay tungod sa vaping. Mas paspas pa og side effect sa sigarilyo kun buot tan-awon.

Kun sa gastos sab maoy hisgotan, dili kaayo layo ang gastos sa vape ug sa pagpanigarilyo, ang kalainan lang base sa ilang pangangkon menus na gyud ang nicotine nga masud sa baga.

Hinuon wala pay klarong medical studies ug uban pang independenteng pagtuon nga nagpakitang ang kaniadto manigarilyohay nga ni-shift sa vaping nahunong na gyud sa pagpabulhot og aso.

Aron patas sa tanan, maayong i-regulate lang ug dili i-ban ang vaping sa nasud aron dunay alternatibo ang manabako.