Lipatlipat sa krisis sa bugas
May gamay’ng problema ang pagsuspenso ni Presidente Rodrigo Duterte sa importasyon sa commercial rice: Wa siyay gahom paghimo ini ubos sa Rice Tarrification Law; bugtong niyang mahimo mao ang pagpausbaw sa 35% nga buhis nga gikolekta sa Bureau of Customs (BOC) aron pagbugnaw sa mga negosyante sa pagkompra og bugas humay gikan sa ubang kanasuran.
Gisugyot na hinuon ni sa gabinete sayo ning tuiga apan gisalikway sa iyang economic managers. Ug ang presidente, nga labihang isoga sa ubang butang, wa igdungog nga mosukwahi nilang Finance Secretary Sonny Dominguez ug kaubanan.
* * *
Ang presidente mismo wa dayon makaumol og klarong baruganan taliwa sa tiyabaw sa mga mag-uuma nga naalkanse sila sa pagtibugsok sa presyo sa tipasi tungod sa pagbaha sa imported commercial rice.
Niadtong Sabado, miingon siya nga suspensuhon ang importasyon tungod sa nagpadayong ani sa mga mag-uuma. Pagka Lunes, niingon na sab nga di diay mahimong suspensuhon ang importasyon.
Apan pagka Martes sa gabii, nideklarar ang presidente nga suspendido nang importasyon, di hinuon hilabtan ang Rice Tarrification Law. Way nakahunghong niya nga ang pagsuspenso sa importasyon pagsuspenso sab sa balaod.
* * *
Legal man o dili, gihulagway sa Federation of Free Farmers (FFF) nga uwahi nang pagsuspenso sa importasyon. Kay human nang ani sa kasagaran sa mga basakan.
Nakakita ang FFF og problema sa laing sugo sa presidente paggahin og P3 bilyones aron ipamalit og mga tipasi: Wa nay kabutangan kay puno ang tanang bodega sa National Food Authority (NFA) nga, bisan gitangtangan na og gahom sa Rice Tarrification Law, niinsistir gihapon sa padayong pag-import og bugas humay.
* * *
Dali rang matapakan ang bisan unsang buslot sa balaod sa mga sugo sa presidente. Kay, segun pang Kongresista Joey Salceda, hadlok mang mga sakop sa Kongreso niya.
Ug tungod sa sige niyang panghulga sa mga huwes, way hukmanan nga mangahas pagsukwahi niya.
Duna lay problema: Iyang sugo pagpamalit sa mga tipasi sa mas taas nga presyo giluwatan niadto pang Septiyembre ning tuiga apan wa tuohi sa mga naglibot niya; ug tungod sa iyang pangedaron ug giangkon nga daghang sakit wa siyang kabantay nga gilipatlipat lang sa iyang mga sinaligan, di lang sa krisis sa bugas kun dili apil na sa ubang eskandalo.
* * *
- Latest
