Pasayloa ko

Nangayo og pasaylo ngadto sa mga mag uuma si Presidente Rodrigo Roa Duterte tungod sa kapakyas sa Departamento sa Agrikultura sa paghikotar sa ilang mga panginahanglan apan wala siya magpakita og sinyales sa pag usab sa balaud nga naghimong liberal sa pag-angkat og bugas sa gawas sa nasud nga gitawag og Rice Tariffication Law nga gitumbok karon nga nakasamad sa panginabuhi sa mga mag uuma.

Hinuon gipasalig sa Presidente nga andam siya nga makigkita sa mga mag uuma aron paminawon ug hikotaron ang ilang mga yango-ngo sama sa barato nga palit sa tipasi nga humay nga ilang gibaligya, wala mahuman nga mga irrigation nga proyekto ug mga daut nga ekipo nga gihatag ngadto sa mga benipisaryo sa mikanisasyon nga proyekto sa gobyerno.

Ang Rice Tariffication Law gipatuman niadtong buwan sa Pebrero ning tuiga nga nagwagtang sa pipila ka mga gidili sa pag angkat og bugas gawas sa nasud pinaagi sa pagpahamtang og taripa hinungdan nga dali na kaayo nga makaangkat og bugas sa gawas ang mga magpapatigayon basta makakuha lamang sila og permiso gikan sa Bureau of Plant Industry.

Ang nahisgotan nga balaud nagporma usab og napulo ka bilyon ka pesos nga Rice Competitiveness Enhancement Fund aron maprotihi-an ang panginabuhi-an sa mga mag uuma.

Ang Presidente mangayo na og pagpasabot sa hepe sa National Irrigation Authority (NIA) sa kalangay sa pagpatuman sa mga proyekto niini.

Ang Commission on Audit mipagawas og taho nga wala makompleto sa pagpatuman sa NIA ang 229 niini ka mga irrigation projects nga gigahinan og 20 bilyones ka pesos. Pangutan-on usab sa Presidente si kanhi Agriculture Secretary Manny Piñol mahitungod sa mga gubaon nga ekipos nga gipanghatag ngadto sa mga mag uuma nga benepisaryo.

Sa pagkakaron kun sumadahon kinsa ang nakapabor sa Rice Tariffication Law ang mga mag uuma o ang mga magpapatigayon og bugas? Murag dili kaigo ang pagpangayo lamang og pasaylo.