Katungod nga mabuhi sa mga durugista

Sa pagdawat ni Bise Presidente Leni Robredo nga mamahimong co-chair sa Inter-Agency Committee on Anti-Illegal Drugs (ICAD) hingpit na kahang masolbad ang problema sa illegal nga drugas sa nasud?

Gihimo siya nga “anti-illegal drug czar” sa administrasyong Duterte nga naglagot kaniya tungod lagi sad sa iyang birada sa mga pagsaway batok sa programang gipatumam batok sa illegal drugs.

Lakip na ang dugoon nga kampanya nga misangpot sa kamatayon sa mga tawong nalambigit sa illegal drugs.

Apan bisan pa man sa ka agresibo sa anti illegal drugs campaign nagpadayon pa gihapon ang pagkuyanap sa drugas nga mao usay gibato sa bise presidente batok sa presidente.

Tungod sa kapungot ni Pangulong Duterte sa mga pagsaway ni Robredo iyang gitudlo kini nga anti-illegal drug czar kay basin makasulbad kini sa problema.

Sa sinugdanan daw dili makatuo ang publiko nga dawaton kini sa bise presidente kay basin laang kini apan gidawat niini ang responsibilidad.

Opposite kaayo ang prinsipyo ni Robredo sa kamot nga bato ni Duterte nga pamaagi sa gubat batok sa drugas.

Karon gusto ni Robredo nga walay patay nga mahitabo sa paggukod sa mga durugista, posible kaha ni mahitabo?

Sa akong tan-aw morag mogara naman hinuon ang mga durugista kay naa naman silay kasandigan nga usa ka bise presidente sa nasud nga modupa alang sa katungod nilang magpakabuhi.

Kong atong mahinumduman nga ingon niini ka grabe sa problema sa illegal drugs tungod sa ka huyang nga programa sa mga nangaging administrasyon pag gukod sa mga durugista nga naka penetrate na gani sa kapolisan ug bisan asa nga mga law enforcement agency.

Natay-og lang sila sa paglingkod na ni Presidente Duterte nga migamit og kamot nga bato batok sa mga durugista apan dili man ingon niana ka sayon sulbaron maong nagpadayon gihapon.

Sa tinagalog pa hindi nakuha sa santong paspasan ni Duterte mobalik na pud sa santong dasalan ni Robredo.

Ambot mosaler ba kon ulog-ulog “bebe-baby-hon” ang mga sindikato sa drugas nga dili pamatyon kay ipatigbabaw gyud ang pagrespeto sa tawhanong katungod nila ug ang ka-sagrado sa kinabuhi.

Atong atangan ang estilo ni Robredo isip anti-illegal drug czar sa nasud basin diay siya ang makasulbad sa problema. Sayo pa kaayo nga hukman nato siya sa bag-o niyang responsibilidad.