Zero killing? impossible goal
BILANG co-chair ng Inter-Agency Against Illegal Drugs (ICAD), target daw ni Vice President Leni Robredo ang “zero killing”. Mukhang malabo iyan.
Sa ano mang drug raid na isasagawa ng mga awtoridad, mayroong tiyak na manlalaban. Armado rin ang mga miyembro ng sindikato sa droga at handang makipagpatayan sa mga tumutugis sa kanila.
Ang dapat marahil hangarin ni VP bilang drug czarina ay tiyakin na kung may mamamatay mang pushers o malaking drug trader, ito’y lehitimong napatay dahil nagtatanggol lang ang tagapagpatupad ng batas sa sarili niyang buhay.
Dapat ding targetin ng Vice President ang pagdakip sa mga malalaking drug lords upang hindi lamang yung mga maliliit na nagtitingi ang siyang nahuhuli. Iyan naman ang ating inirereklamo di ba? Bakit puro magtitingi at adik lang ang nabibiktima ng tokhang at yung mga malalaking drug lord ay nananatili sa laya. O kaya, makulong man, patuloy pa rin nakakapagnegosyo ng ilegal sa loob ng kulungan.
Nauna nang sinabi ni Presidente Duterte na hindi madaling timbugin ang mga big time drug lords dahil ang mga ito ay maaaring nagtatago sa ibang bansa o nakakapagtago dahil sila ay maraming pera at maraming puprotekta sa kanila.
Okay ang hangarin ni VP Leni na “zero killing” pero imposibleng mangyari. Kaya dapat isulong ang paggamit ng body camera ng mga opertiba ng batas upang mai-record ang bawat enkuwentro nila sa mga kriminal. Ano nga ba ang nangyari sa panukalang ito, naipatutupad ba?
Hindi kasi puwedeng huminahon ang isang pulis kung amba na siyang papatayin ng tinutugis na kriminal. Katunayan nga, hindi lang naman kriminal ang napapaslang sa mga operasyon kundi pati mga alagad ng batas.
- Latest