Kahimsog ug politika
Pulos gidungog nga nangamatay silang kanhi Cebu City Mayor Tommy Osmeña ug kanhi Toledo City Mayor Sonny Osmeña dayong Kalagkalag. Apan si kanhi Cebu City Councilor Margot Osmeña niingon nga na-ospital apan wa mag-ungaw sa kamatayon ang iyang bana ug si Sonny Osmeña mismo niingon nga dako siyang buhi.
Human nangapilde sa piniliay niadtong Mayo, wa na maghupot og katungdanan ang duha ka kanhi mayor. Wa na silay obligasyon sa pagahibawo sa publiko sa kahimtang sa ilang panglawas. Apan ang ilang mga kaatbang mopalabay sa bisan unsang kahigayonan pagtunglo nila.
* * *
Nanukad ang mga huhungihong sa dihang nakit-an si Tommy Osmeña nga mas luya ug mas luspad kay sa naandan sa pagtambong og pribadong party (klarong usa sa giimbitar ang nanabi) maong na-ospital:
Gibutang dayon nila si Tommy Osmena sa ICU, o gipaubos sa dialysis, o gitiwasan na lang gyod;
Puslan mang naluya si Tommy Osmena, gitukmod na lang sab nila si Margot Osmeña og aksidente atol sa biyahe sa Iloilo; ug
Puslan mang may nahinaykan na silang Tommy ug Margot, giapil na lang sab nila og luba si Sonny Osmeña.
* * *
Mga dumadapig nilang Tommy ug Sonny Osmeña nisumbalik pagpasidaan nga di pa angayng magsaulog sa ilang mga kaatbang. Nipahinumdom sila nga kasagaran sa mga karibal sa duha ka Osmeña nga sud na sa daghang katuigan nagsige og butangbutang og sakit o tagal sa kinabuhi nila maoy nag-una og taliwan ug gi-ugbokan na gani og daghang kandila sa nangagi pang mga Kalagkalag.
Ato hinuon ning klaruhon: Way sukaranan sa medisina ang pagtuo nga ang pagpanungo makapamubo sa kinabuhi.
* * *
Sa pikas nga bahin, daghang nanggungis nga mga politiko ang niinsistir nga ang politika maoy nakapataas sa ilang kinabuhi. Napamatud-an ni sa inilang politiko nga bisan nagsaguyod nang molakaw ug hinog na og pangedaron nidagan gihapon sa niaging piniliay.
Ni-text ko niya mahimo bang interbyuhon pinaagi sa telepono mahitungod sa isyu nga nitumaw sa kampanya. Nitubag siya nga ala-una pa sa kadlawon mahuman ang iyang rally, kon di na kong kapaabot kinahanglang momata ko og sayo pagka sunod buntag aron maabtan pa nako kay magsugod na siya og pangampanya sa kabalayan sa alas-5 sa kadlawon.
* * *
- Latest
