Unay sa industriya sa baboy
Kon nagkinahanglan og laing pahinumdom si Presidente Rodrigo Duterte nga nagkinahanglan siya og mas takos nga tagduma sa kampanya batok sa African Swine Fever (ASF), mangahas mi og tanyag isip ebidensiya sa kataphaw sa liderato ni Agriculture Secretary William Dar ang panag-unay sa mga negosyate og baboy sa Luzon, Kabisay-an ug Mindanao.
* * *
Ang Philippine Association of Meat Processors Inc. (PAMPI), kansang mga produkto sa baboy gi-ban sa 62 ka lalawigan, nibawos sa taga Sugbo ug ubang lalawigan pinaagi sa pag-boykot sa lokal nga karneng baboy nga ilang gidudahang natakdan na sa ASF.
* * *
Klarong panimawos ning gihimo sa PAMPI kay 12 na lang ka lalawigan sa tibuok Pilipinas ang nidawat sa ilang mga delata ug ubang produktong baboy. Wa malibkas ang ban sa Sugbo ug ubang lalawigan bisan gidapigan unta ang PAMPI sa Department of Agriculture (DA), Department of Trade and Industry (DTI) ug Department of Interior and Local Government (DILG).
Nisuway unta sila sa pagpakitabang ni Presidente Duterte. Apan wa silang kaatubang niya. Nigahin hinuon ang presidente og mas dakong panahon sa pagsuway paghusay sa away sa mga Barreto.
* * *
Gihangop sa lokal nga mga negosyante og baboy sa Sugbo ug ubang lalawigan ang ban sa pork products sa Luzon kay di na sila mapuhalan sa mas dagkong budget sa advertising ug marketing sa higanteng mga kompaniya nga sakop sa PAMPI.
Mahimong gipaburot sa PAMPI ang pangangkon nga P120 bilyones nay ilang alkanse tungod sa ban. Apan di angayng isugal ang panginabuhi sa 150,000 ka trabahante sa P300 bilyones nga industriya sa baboy.
* * *
Gamay ra ang epekto, kon duna man, sa pagboykot sa PAMPI sa lokal nga mga karneng baboy. Kay 10 porsiyento ra sa panginahanglan sa mga planta sa PAMPI ang gikan sa lokal nga mga tinubdan, ang 90 porsiyento gikan sa ubang kanasuran.
Mas makapabalaka ang pasangil sa PAMPI nga mahimong may ASF nang mga baboy sa Sugbo, Kabisay-an ug Mindanao apan gitagoan sa mga negosyante. Wa pa hinuony nahibaw-an dinhi sa ato nga lapad nga pagkamatay sa mga baboy, nga timaan sa ASF.
Kon tarung pa lang ang liderato ni Dar, magtinabangay unta ug di mag-unay ang mga negosyante og baboy.
* * *
- Latest
