Agik-ik ug talidhay

Husto ang gihimo ni Vice Mayor Michael Rama nga pag-resign sa pagka chairman sa Sinulog Foundation Incorporated kay wa man siya makagusto nga nagmugna si Mayor Edgardo Labella og Sinulog Governing Board.

Si Labella karon maoy mayor, ug siya ang magbuot kon unsaon niya pagdumala ang siyudad. Wala hinoon did-i ang katawhan nga mosaway kang Labella kon may makita nga dili maayo sa iyang binuhatan.

Apan ang pagmugna ni Labella og Sinulog Governing Board gitumong ra man aron pagpalambo sa mga kalihokan sa Sinulog.

Ang Sinulog Governing Board gilangkoban sa mga pangulo sa lainlaing ahensya sa kagamhanan, apil ang kapolisan ug militar.

Giapil pa gani ni Labella nga sakop sa Sinulog Governing Board mao ang gobernador sa Sugbo. Ang kalainan sa pundok nga gimugna ni Labella mao nga grupo kini sa mga opisyal sa kagamhanan, samtang ang SFI usa ka Non-Government Organization.

Ubos sa balaod, ang City Hall wala tuguti nga direktang makahatag og tabang salapi ngadto sa SFI aron magamit nila alang sa mga kalihokan sa Sinulog.

Mao man gani nga atol sa termino ni Rama kaniadto, mihimo siya’g mga inantigo nga paagi. Ang SFI mo-request og suporta gikan sa City Hall, ug ang City Hall mamalit sa mga kinahanglanon ug maoy mobayad sa mga premyo sa mga winners, ubos sa pagtugot sa City Council.

Ang buhaton ni Rama sa pagkakaron, utong lang gyud kay dili man siya ang mayor. Handumon lang niya ang kanunay niyang gilitok kaniadto nga “pagmayor usa mo.”

Panid-an usa nato kay basin diay og pinaagi sa pagmugna ni Labella og Sinulog Governing Board, mosamot kaalegre ang Sinulog grand parade ug nga kapangitaan nila og paagi nga dili na kinahanglang pagngon ang signal sa mga cellphone atol sa parada.

Tan-aw nako, basin og mahimo ra ni kay ang labing dakong opisyal sa AFP Central Command ug Cebu City Police Office (CCPO), kabahin na man sa Sinulog Governing Board.

* * *

Daghan ang nangutana nako kon unsa kaha ang dagan sa politika dinhi sa dakbayan sa Sugbo sa sunod eleksyon? Akong tan-aw nga dunay posibilidad nga si Rama mahigala sa mga sakop sa Bando Osmena Pundok Kauswagan nga gipangulohan ni kanhi mayor Tomas Osmeña.

Pero kon mahitabo ni nga magkahigala pagbalik si Rama ug Osmeña, si Osmeña maoy mabutang sa kataw-anan. Wala malilong kaninyo nga si Osmeña kanunay’ng mohingan ni Rama kaniadto nga “adik.”

May higayon man gani nga giingnan gyud nako si Tommy nga dili ko motuo nga adik si Rama, pero ang iyang pagniwang nagumikan kay taas siya og blood sugar. Wala na motingog si Tommy.

Mao nga kon dawaton ni Tommy si Rama sa BOPK, una ko nga moagik-ik ug dayon motalidhay!!!