Unsa pag-transfer sa inherited property

Dear Atty. Divine,

Ang akong igsuon namatay ug duna kini gibilin nga property lakip na ang house and lot. Ang iyang husband foreigner, so nakapangan lang sa akong igsuon ang maong mga property. Duna silay usa ka anak nga of legal age na.

Ang akong pangutana kun unsay unang buhaton aron ma-transfer ang property sa anak sa namatay? Daghang salamat.

Jessa

* * *

Dear Jessa,

Ang unang buhaton sa anak sa imong pagumangkon mao ang pagbayad sa Estate Tax sa iyang inahan nga namatay. Ang bana sa namatay nga usa ka langyaw generally, dili makapanag-iya og real property dinhi sa Pilipinas kay gidili man kini sa balaod apan aduna kini exemption ug kini mao ang hereditary succession.

Buot ipasabot nga pwede siyang maka inherit sa iyang asawa. So, ang buhaton sa amahan ug anak mao ang pag execute og Extrajudicial Partition sa tanang properties nga gibilin sa imong igsuon ug dayon ila kining i-submit sa BIR uban sa Tax Declaration ug Certified True Copy sa mga titles kun kini titulado alang sa pagpa-compute sa Estate Tax.

Apan aduna pay laing nga documents nga gi-require ang BIR so mas maayo nga mangayo mo daan sa list of requirements.

Human sa pagbayad sa Estate Tax mo release ang BIR og Certificate Authorizing Registration or CAR, mamahimo na dayon nga i-transfer ang ownership sa mga property. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.