Pagluthang ni mayor

Wala pay klarong suspek ang kapolisan ning dakbayan sa Sugbo sa kamatayon ni Clarin, Misamis Occidental Mayor David Navarro, kinsa giluthang sa mga armadong tawo kaniadtong Biyernes sa hapon.

Kinsa kaha kadtong mga mamumuno ni Navarro? Alang sa pipila ka tigpaniid, klaro nga mga hanas na kadtong mga mipatay sa maong mayor. Kini tungod kay maayo pagkaplano ang maong krimen bisan pa man kun adunay mga police escort ang biktima.

Hinuon daghan ang nagpunting sa iyang pagka-narco politician nga maoy hinungdan sa kamatayon ni Navarro. Kini gumikan kay mao usab kini ang gidangatan niadtong lokal nga mga opisyal kinsa giingong nalambigit sa ilegal nga druga.

Mismong si Presidente Rodrigo Duterte ang miakusar ni Navarro nga usa sa lokal nga mga opisyal sa nasud nga nalambigit sa druga. Gani, kaduha gayud nganli sa presidente ang mayor, ug ning bag-o kaniadto lamang Marso.

Dakong kontrobersiya ang pagbisita dinhi sa Sugbo ni Navarro, kinsa gikatahong giimbitar isip guest sa usa ka convention. Sa wala siya atngi ug hunosi sa kinabuhi, nalambigit kini sa eskandalo sulod sa usa ka massage parlor. Sa maong kontrobersiya, makita sa CCTV nga gibinaklid ni Navarro ang attendant sa spa kay nasuko kuno siya kay walay available nga babaye nga massage therapist niadtong higayona. Ug giakusahan usab ang mayor og acts of lasciviousness sa usa ka female therapist.

Kini ang hinungdan nga gipasakaan og complaint ngadto sa kapolisan ang mayor ug pagkasikop niini didto sa airport samtang nagpaabot siya sa iyang flight pauli sa Misamis Occidental. Apan walay swerte ang mayor tungod kay mga bala ang misugat niini padulong sa prosecutor’s office.

Ambot kun kinsa gayud ang responsable sa pagpatay kang Mayor Navarro. May kalambigitan kaha niini ang akusasyon sa iyang pagka-‘narco’ mayor? Kini maoy angay natong mahibaw-an. Apan kinsa ba gyuy moangkon? Sa akong paminaw wala.