Kalinaw: Kawsa o Pangwarta?
Miawhag ang Office of the Presidential Adviser on Peace Process (OPAPP) sa paglangkob sa “Peace Education” sa mga kurikulum sa atong sistema sa edukasyon sa tumong nga kapugngan ug mabatukan ang “violent extremism ug insurgency.” Dugang na usab kini’ng tuition nga pas-anon sa mga ginikanan apan, sama sa subject nga “Pilipino”, “Rizal”, “Spanish” ug uban pa, walay tataw nga kahibalo nga naani ang mga estudyante. Daghan na ang nakasapi sa paggamit sa pulong “KALINAW” sa ilang kawsa. Gimik pa more!
TURISTA PADAGHANON
Tumong karon sa Sinulog Governing Board ug sa Sinulog Foundation nga padaghanon ang mga turista sa umaabot nga Sinulog 2020. Segun sa datos, nagkamenos ang mga turista nga mianhi sa Sugbo atol sa Sinulog sa milabay nga lima ka tuig. Nagkahiusa na ang duha ka pundok nga nagdumala sa Sinulog sa maong tumong pagdani og daghang turista apan gikataho nga wala pa sila magkahiusa ug magkasinabot sa mga kalihokan nga pagabuhaton aron makab-ot ang maong tumong. Daghang kusinero, makapalas-ay lage sa sabaw!
ALAOT ANG NAA SA UBOS
Gikataho nga adunay pundok sa mga pribadong hospital nga mihulga nga dili na nila bag-ohon ang ilang accreditation sa PhilHealth agi og pagprotesta sa kalangay sa paghikay sa ilang bayad gikan sa maong ahensya. Adunay panultihon nga kon magsungag gani ang mga kabaw, ang mga hulmigas gayod ang mapagan ug mayatakan. Niining panagbangi tali sa mga pribadong hospital ug sa PhilHealth, hayan ang mga pobreng katawhan na usab ang mapagan ug maigo sa ilang kasungian. Luoy kanunay ang pobre!
PANGHAYHAY MO, MULTAHAN MO
Naglaraw karon ang kagamhanan sa Dakbayan sa Manila nga panghingusgan pagbalik ang pag-implementar sa ordinansa nga nagdili sa pagpangalaba sa kilid sa gutter og pagbutang og mga hinayhay sa mga kable ug poste sa kadalanan.
Ang silot sa kalapasan sa maong ordinansa mao lamang ang multa o priso, wala mahisgoti kon kumpiskahon ba ang nilabhan o hinayhay. Sa kahimtang karon sa mga pinuy-anan sa Manila, kon dili makakita og paagi ang hingtungdan, hayan magsige na lang unya og multa ang katawhan. Dili na gayod libre bisan ang pagpa-anindot sa kalikupan!
- Latest