Iwit gihapon sa suholan
Ug natinuod ang gikahadlokan sa mga anak sa singot sa Sugbo ug Central Visayas. Naapsan na ang atong minimum nga suholan sa silingan nga rehiyon sa Western Visayas.
Tungod sa pag-aprobar sa ilang regional wage board sa laing P30 nga uminto, mosaka na ang ilang minimum nga suholan ngadto sa P395 matag adlaw.
Nalabwan na ang atong minimum nga suholan nga P386 matag adlaw.
Mahimong tinuod ang pangangkon sa atong mga negosyante nga ang Central Visayas maoy labing malambuon nga rehiyon gawas sa Luzon. Apan di sila maoy labing manggihatagon.
* * *
Dako kaayo ang labaw sa minimum nga suholan sa atong rehiyon kun itandi sa ubang mga rehiyon sa Kabisay-an ug Mindanao sa nangaging katuigan. Apan hinay-hinay nga nihiyos ang kang-a sa matag luwat sa tinuig nga wage orders sa regional wage boards.
Daghang salamat sa katihik sa mga representante sa mga negosyante nga nakigkunsabo sa mga representante sa gobiyerno sa atong rehiyon. Nilampos sila pagbasura sa petisyon sa mga mamumuo sa mas makiangayong uminto. Ug salamat sa ilang katapolan, kita say kanunayng maiwit sa pagluwat og bag-ong wage orders.
* * *
Kun di mausab ang binuang nga sistema sa wage boards—nga kanunayng mapilde ang duha ka representante sa labor sa sabotahe sa duha ka representante sa management ug duha ka representante sa gobyerno (NEDA ug DTI)—mahimong maapsan na sab ta sa uban pang rehiyon kansang mga ekonomiya mas gamay kay sa ato.
Kun padayong magkatibuwaag ang nagkaribal nga labor groups mahimong mangiwit na gyod ang suholan ug mga benepisyo sa atong mga mamumuo kon itandi sa ubang bahin sa nasud.
* * *
Padayon sab nga nagkadako ang biya sa kita sa atong mga mamumuo sa minimum nga suholan sa Metro Manila. Nga human sa P25 nga uminto sa niaging tuig niabot na og P537 matag adlaw.
Nga mas moburot pa gyod inig takda sa ilang wage board og bag-ong uminto sa suholan unya sa sunod buwan.
Way katin-awan nga makatapak sa P151 nga kang-a sa mga suholan sa mga mamumuo sa Sugbo ug Manila.
Samang di makiangayon ang paglansang sa mas gagmayng suholan sa ubang rehiyon. Kanus-a man mapugwat ang Kongreso sa panginahanglan pagtakda og nasudnong minimum nga suholan?
* * *
- Latest
