EDITORYAL-Pagpakabana sa katawhan

Nagkaduol na ang kapaskohan, karon nga niabot na ang gitawag og “ber months” o ang mga bulan gikan sa Septiyembre hangtud na sa Disyembre.

Matud pa nga niining mga bulana abunda ang katawhan sa kwarta, may kamatuoran man o dili, apan makita man sa mga kalihokan sa mga tawo, palit diri ug palit didto. Hinuon dili baya gyud siguradong duna gyuy daghang salapi ang tanan, du na say uban nga pila ka Pasko na ang miagi wala gihapon silay kwarta. Tingali, kanang makita diha nga magsige nalang og palit, mao lang kadtong abunda o ba kaha napugos pangutang aron makapamalit para sa ilang pamilya.

Apan dungan sa pagka-busy sa mga tawo mao usab ang mga kriminal ilabi na ang mga tulisan. Naobserbahan sa crime statistics sa kapolisan sa nanglabay nga mga katuigan nga sa “ber months” maoy daghang insidente sa pagpanulis. Niadtong nakalabay nga adlaw nga Sabado, kinse ka mga tulisan ang nanulis sud sa usa ka dakong mall diha sa Barangay Bankal, Dakbayan sa Mandaue diin gibanabanang P130 milyones nga alahas ug kwarta ang ilang nasakiyo. Walay kulba ang mga tulisan sa ilang gihimo sanglit malampuson gyud baya ilang pagtulis sa maong mga pawnshops ug money changers sud mismo sa mall. Kabalo gyud sila nga magmalampuson sila adtong adlawa. Apan samtang tuod milampos sila sa ilang gibuhat sa maong mall ug nakaipsot sa mga otoridad sa Mandaue City, ang wala nila matagna ang kapaspas na karon sa komunikasyon sa kapolisan.

Kay pag-abot nila sa Dakbayan sa Bogo diin unta sila manukad sakay og barko padulong sa Masbate aron moikyas, wala nila damhang naalerto na ang kapolisan sa maong siyudad bahin sa ilang gibuhat sa Mandaue City, ang resulta, upat sa ilang mga sakop ang namatay apil ilang lider ug nadakpan ang lima ug upat pa ang gipangita.

Usa kadto ka dakong leksyon sa katawhan ilabi na sa mga balay patigayon nga dili magkompiyansa sa ilang seguridad sa tanang oras, ilabi na niining mga panahona.

Leksyon sab kadto sa kapolisan sa tanang mga lugar, kay bisan tuod nga gidemalas gihapon ang mga nanulis, dili mahimong ibalewala nga nilampos sila sa ilang pagtulis og mall nga estrikto man unta ang seguridad ug nakaikyas sila sa mga polis sa Mandaue City. Kun wala pa sila molahos diretso sa Bogo, may dakong posibilidad nga wala sila masakpi sa polis didto. Ang seguridad tulubagon sa tanan, dili mahimong isalig lang ang tanan sa kapolisan. Matag usa kinahanglang magpakabana sa tanang oras.