Marukoy Ang Pinoy

Usa ka pasahero sa eroplano gikataho nga misulbad sa iyang suliran mahitungod sa sobra’ng  timbang sa iyang bagahe pinaagi sa pagsul-ob sa maka-usa sa hapit tanan niya nga sobrang sinina ug mga karsones. Inantigo ang maong solusyon bisan pa man kon ang iyang hitsura nahisama na sa kumbinasyon sa bodbod nga nilambiran ug lumpia nga na-umil. Pagkamarukoy na man gyud sa Pinoy!

MAGBINISAYA MI…MAGBUOT MO?

Gitawag sa NHCP ang atensyon sa kagamhanang lokal sa Misamis Oriental human gikataho nga ilang gigamit ang Cebuano nga bersyon sa Lupang Hinirang atol sa ilang flag ceremony. Ang R.A. 8491, kon Flag and Heraldic Code of the Philippines nagmando nga ang Nasudnong Awit paga-awiton lamang sa pulong nga tinagalog kon Filipino. Dugay na’ng gisupak kining maong kamanduan dinhi sa Sugbo apan walay susamang pahimangno gikan sa NHCP ang nadawat sa kagamhanan. Sa masakpan lang ba o ehemplo kini sa giingon sa usa ka kanhi Gobernador sa Sugbo: “Magbuot mo?”

 UMAABOT NGA “KAHINGUHAAN”

Ang House Bill 2069 nga gipangamahanan ni House Minority Leader Bienvenido Abante Jr., nga maghimo unya nga “mandatory” ang pagtuon sa bibliya sa mga publikong tunghaan, miani ug nagkadaiyang panahom. Kon mapasar ang maong balaodnon, hayan makakita na kita’’g mga kabataan nga makiglalis na sa ilang ginikanan mahitungod sa matuod nga kahulogan sa Pulong sa Diyos.  Dili ba kaha modaghan ang mga relihiyon nga pangulohan unya sa mga kabataan? Daw aduna ko’y nalantawan nga dakong “kahinguhaan” sa kabataan sa umaabot!

LEGALIDAD O KAAKOHAN?

Nagsugod na ang binayloay sa huna-huna tali sa mayor sa dakbayan sa Sugbo ug sa mga miyembro sa MCWD Board kalabot sa pagpalagpot sa naulahi sa ilang katungdanan kansang kamanduan gisupak usab sa mga miyembro sa board. Taliwala niining managlahing baruganan, ang mga argumento lamang ang midaghan; padayon lang gihapon ang suliran sa kakulang sa tubig. Dili na man tingale kini isyu mahitungod sa legalidad sa pagpalagpot o ba kaha sa pagmakuli pagluwat kon dili isyu kini sa kapabilidad, responsibilidad ug sa hustong panglantaw sa kaayohan sa katawhan. Way agas gihapon!

HAGIT PAGHAW-AS SA KAKABOS

Gikataho nga ang dakbayan sa Sugbo gitumbok nga ika-lima nga labing adunahan nga dakbayan sa Pilipinas.  Alang kang Mayor Edgar Labella, haguka ang maong estado kon magpabilin nga kabos ang daghang Sugbuanon.  Hagit kanunay sa matag pamunoan ang pagpalambo sa kahimtang sa katawhan.  Sa atong nakita, pakyas ang tanan’g nangagi’ng pamunoan sa pagtubag sa maong hagit.  Padayon ang kakabos!