Tubig mipatubod og dugo

Tubig! Mao kini ang singgit sa liboan ka kustomer sa Metro Cebu Water Distict (MCWD), kinsa nahiagom sa grabeng kaigang sa ilang kalawasan ug gustong maligo, apan walay tubig nga magamit kay inig liso sa faucet, panghupaw ray mabati ug walay bisan usa ka tulo na lang ang moagay.

Gumikan sa pagnihit sa tubig, gipahi-gayon sa MCWD ang water supply rationing, diin ang tubig nga masawod sa panimalay ngadto sa mga dagkong balde o baril aron maoy imnon, ikaligo ug iluto, dili gyod paigo.

Sa akong pagpamahaw sa restaurant duol sa Ramos Market niadtong October 9, nabati ko sa naninda ang kanihit sa tubig nga magamit sa ilang pagpaninda. Mga pundo nilang tubig nga sinulod og galon, inihap. Di baleng sila maoy makahuwam og tubig sa mga silingang nanindahay. Nungkang, sila maoy hulaman. Diay sa ilang lugar, tubig daginoton sab.

Pagsulod nako sa One Pavilion Department Store, nadunggan ko ang duha ka lady guards nga nagtabi bahin sa krisis sa tubig. Mihunong ko ug mi-join nila dungan ang pagsukna: “Unsa, Miss, mi-duty ka nga wala makaligo?”

“Naligo, Sir, uy! Hasol lang. Kay didto ko sag-ob sa layo kaayong sag-obanan dala ang usa ka basiyong container sa mineral water nga maoy akong gisudlan. Unya, may bayad pa gyud. Tag P6ang galon.” Sa guwapa pa nga mitunol nakog rolling grocery cart.  Nakapanglingolingo ko. Kagrabe na sa water supply problem!

Among kauban sa trabaho, kinsa nakatagamtan pud sa pagnihit sa tubig sa MCWD, mitrabahong walay kaligo. Kay wala man gyud moagas ilang gripo. Maayo gani kay dinha may 500 ml-mineral water sa ilaha, aw, mao na lay iyang gihilam-os. Paita, sa?   Niining bag-o duha ka silingang magsuon ang nagkalalis gumikan sa kanihit sa tubig sa ilang dapit. Sa kawalay tubig nga magamit, ilang ulo miinit. Misangpot sa dakong kapungot nga midilaab sulod sa ilang galamhan.

Ang manghod mikuhag rebolber ug gipusil ang magulang. Pero iyang armas mikagar. Nailog sa magulang, kinsa sa tumang kapintas, mibalos. Gitigbas sa sundang ang liog sa manghod ug nahagba dungan ang pagtubod sa daghang dugo nga gisawod sa nag-ugang yuta,  Kini nahitabo tungod lang sa tubig.