Padayon ang krisis sa tubig

Gitang-tang ni Cebu City Mayor Edgardo Labella ang mga sakop sa Board of Directors sa Metropolitan Cebu Water District (MCWD) tungod kay wala nila matagbaw ang ilang mga konsumidor.

Ang mga sakop sa board nga gitang-tang sa Mayor niadtong Martes mao sila si Chairman Joel Mari Yu, Vice Chairman Ralph Sevilla, Secretary Cecilia Jugao-Adlawan ang mga membro nga sila si Procopio Fernandez ug Augustus Pe, Jr.

Ang lima nga may unom ka tuig nga termino mipili sa pagpakahilum sa ilang pagka tangtang sa katungdanan. Gawas kang Procopio Fernandez nga tinudlo ni kanhi mayor nga karon Bise Mayor Mike Rama, ang nahabiling upat mga tinudlo na ni kanhi mayor Tomas Osmeña.

Sa iyang suwat ngadto sa mga sakop sa board, giladlad sa mayor ang mga kasagmuyo sa mga taga dakbayan sa Sugbo, Mandaue ug Talisay ug mga lungsod sa Consolacion, Liloan, Compostela, Cordova ug lalawigan sa Sugbo nga mipagawas og resolution kabahin niini batok sa MCWD.

Ang lapad nga reklamo sa mga konsumidor ang gihimong rason sa mayor sa iyang pagtang-tang sa mga sakop sa board sa MCWD.

Ubos sa balaud nga nagmugna sa MCWD, ang mayor gihatagan og gahom sa pagtudlo ug pagtangtang sa mamahimong sakop sa board sa MCWD.

Ang pagtangtang sa mga sakop sa board dili makahatag og kaseguroan nga maundang na ang krisis sa tubig. Hinuon dako ang posibilidad nga magpadayon kini kun sakto ug wala mamakak ang MCWD sa ilang gihatag nga rason sa paghinay ug paghunong sa agas sa ilang gibaligya nga tubig.

Manghinaut lang ko nga namakak ang MCWD sa ilang gihatag nga rason sa paghinay ug paghunong sa agas sa tubig nga ilang gibaligya aron mahimong tubag ug sulbad sa krisis sa tubig sa Metro Cebu ang pagtangtang sa mga sakop sa board.