Dili angay’ng mahadlok

Pagsuwat nako niining mao nga lindog, wala pa ang tigum sa mga sidewalk vendors ug ni Cebu City Mayor Edgardo Labella aron hisgotan nila ang isyu nga paghawan sa atong mga aseras.

Wala pa ko masayod kun tugotan ba ni Mayor Labella ang mga sidewalk vendors nga makabalik sa pagpaninda sa aseras, ug molingiw na lang siya ug dili pamation ang mga bagotbot sa mas labing daghan.

Dunay nangagpas nga ingon gyud kuno niini ang mga politiko nga maglikay sa paghimo og mga lakang nga makapasuko sa mga botante aron nga dili sila yam-iran inig-abot sa eleksyon.

Unta, barugan ni Mayor Labella ang iyang gisulti nako nga bahala na og usa lang siya ka termino nga mahimong mayor, basta mapakita lang gyud niya ang nindot nga pagdumala sa kagamhanan.

Diha ko midayeg ni Mayor Labella niini ug gipasaligan nga mokuyog ko niya sa paghimo’g kausaban dinhi sa dakbayan.

Sa giingon na nako, kon padayon nga ang modumala sa siyudad mora lang og lusay nga magpilay-pilay, moabot ang panahon nga ang mga karsada mahisama na lang og dalan-dalan.

Aw, sumala gud sa atong kasapaan nga kaniadto lapad ug kaagian og mga baruto o mga sakayan, sama sa Estero Parian nga nanukad sa Pier Tres paingon diha sa likud sa The Freeman, karon maguwang na lang sa kanal.

Kaniadto, ang karaang mapa nagpakita nga ang mga de-katig nga sakayan sa mga negosyante, makasulod diha sa Estero Parian kay mao may kargahan sa mga produkto nga igbabaligya.

Nganong nigamay man ang sapa? Tungod kay ang mga nangaging mayor sa dakbayan sa Sugbo, nga ang uban mga nangamatay na, wala mohimo sa ilang katungdanan ug gipasagdan ra ang mga tawo nga mihimo og “riprap” sa ilang balay nga nakapagamay sa atong kasapaan.

Mangita mo og klaro kaayong ehemplo? Tan-awa kanang karaang taytayan sa Sikatuna Street nga gihimo 1920, makita nimo nga kanang building sa negosyante og puthaw daplin sa sapa, miabot na sa tunga sa sapa ug hinungdan nga kun may uwan, moawas dayon ang gamay na nga sapa diha sa maong dapit.

Mayor Labella, ang mga Sugboanon manginahanglan og mga mayor nga sama kanimo, naglantaw sa kaugmaon sa Sugbo.

Unya, ang sunod nga maayong himoon, bawion nato ang mga aseras gikan sa mga tawo nga misakop na niini isip kabahin sa ilang balay.

Daghan kaayo kini dinhi sa siyudad, ilabi na diha sa Taboan District kay nakapuyo ko niadto kaniadto. Diha ko magdagan-dagan sa aseras, apan karon ang aseras wala na.

Aw klaro man kaayo nga makita kun tan-awon lang hain ang miabuso ug mga kawatan og luna sa aseras.