EDITORYAL - Dako og papel ang LGUs

Ang pag-inom og bino o alcoholic drinks gihulagway sa World Health Organization nga usa sa mga hinungdan sa sayong kamatayon sa mga tawo kun sila sayo palang sa pangidaron nagsige na og inom niini.

Sagad sa mga sakit naglakip sa kanser, kanser sa atay, ug uban pang komplikasyon. Samtang daghan sab sa mga aksidenteng nikalas og kinabuhi dinhi sa Pilipinas nalambigit sab sa pag-inom nga niresulta sa grabeng kahubog. Ang mga Pilipino nabantog na nga kusog manginom og bino. Dili kini ikalimod tungod kay bisan asang dapit adunay daghang makitang mga imnanan, dagko ug gagmay. Duna pay mga sari-sari stores nga namaligya niini. Ning bag-o lang ang Food and Drug Administration (FDA) nipagawas og memorandum circular sa tanang mga supermarkets, mga establisamentong nagbaligya og ilimnong makahubog nga ibuwag gyud kini og display layo sa mga ilimnong pangbata, kinahanglang aduna gyud kini paskin nga “Alcoholic Beverages” kini.

Gituyo kini aron nga dili sayon sa mga kabatan-onan nga makita kini dayon diha sa mga tindahan aron sa ingon mamenusan ang gidaghanon sa mga kabataang nagumon sa bino. Apan ang pangutana, motuman ba niini ang mga sari-sari stores? Nga gisagolsagol raman ang display nilang baligya?  Maayo kini nga kampanya sa FDA apan siguradong ang motuman niini kadto lang mga dagkong tindahan ug dili ang mga gagmay nga mga tindahang namaligya sab niini kauban sa uban pang mga produkto.

Sama sa nahitabo sa pagdili sa mga nagbaligya og mga sigarilyo ngadto sa mga bata, ang mga dagkong tindahan ray nisunod. Apan sa mga kabarangayan, mismo pa ang ginikanan mosugo sa ilang mga anak pagpalit og sigarilyo ug ang uban padagkutan pang daan sa naninda.

Dinhi sa Sugbo adunay ordinansa nga nagdili sa mga establisamento 100 meters gikan palibot sa mga tunghaan nga mobaligya og mga ilimnong makahubog. Usa kini sa mga maayong pamaagi pagsigurong way mga estudyanteng maghuboghubog inay matuon.

Apan kun kutob ra pud sa papel ang regulasyon sa FDA ug dili motabang ang mga LGUs wala gihapon kaayo kini dakong epekto.