Pakaaron-ingnon

Makapangyamiid gyud ko kon makadungog na nga may mga tawo nga nagpatuo nga environmentalist ug mobabag kunohay sa pagpamutol sa mga kahoy nga anaa sa karsada.

Akong balikon, daygon nako mo kon motungas kamo sa kabukiran aron pasakaan ninyo og kaso ang mga tawo nga namutol sa mga kahoy nga walay pagtugot sa DENR.

Ang kadagkoan sa Department of Public Works and Highways (DPWH) mikuha gyud og permit gikan sa DENR aron maputol ang mga kahoy nga anaa sa karsada.

Nakita sa DENR nga ang maong mga kahoy nakarisgo sa publiko kay posible nga madasmag niini ang mga sakyanan kay ang mga kahoy anaa na sa karsada, diha nga gipalapdan ang karsada.

Sus, kadaghan sa mga kahoy nga gipangputol sa mga kontraktor sa DPWH didto sa mga karsada sa Tabuelan, nganong wala man kamo magsaba-saba? Abi kay wala man mabalita sa media?

Sa kabukiran, daghan kaayong mga dagkong punoan sa kahoy, mga karaang tugas, apitong ug uban pa nga mga kahoy, gigabas kay himoong tabla ug itukod kini og balay. Hilom man lagi mo?

Nagpasabot ba kini nga kon dili mabalita sa media dili sab kamo magsaba-saba nga mga nagpatuo nga environmentalists?

Unsa kaha ang inyong bation kon may paryente kamo nga makasakay sa mga sakyanan nga mabangga nianang mga punoan sa kahoy nga anaa na sa karsada?

* * *

Isip mayor sa dakbayan sa Sugbo, angay’ng ipatawag ni Mayor Edgardo Labella ang kadagkoan sa MCWD aron personal sila nga pakisayran kon unsay sulbad nila sa grabe kanihit karon sa tubig dinhi sa siyudad.

Matud sa uban nga mas maayo pa nga walay kuryente kay sa walay tubig, mao nga angay gyud nga hatagan kiini og pagtagad sa mayor, ug dili kay isalig ra niya sa iyang mga sinaligan.

Kuwang ang pag-ingon nga mohimo siya og lakang legal kon walay gihimo ang mga sakop sa MCWD Board sa problema.

Angay’ng tan-awon ni Labella kon pila ka cubic meters nga tubig ang gikompra sa MCWD gikan sa supplier nga mikuha og pundo sa tubig gikan sa Luyang River sa lungsod sa Carmen, Cebu.

Wala mahitabo nga nagkuwang og tubig ang sapa sa Carmen ug akong nahibaw-an, kay ako man maoy tig-cover niini kaniadto, nga ang supplier nga mao ang Manila Water makasuplay og 25,000 cubic meters nga tubig kada adlaw, o subra pa gani.

Angay’ng sutaon ni Labella kon unsa kadaghana karon ang gipalit nga tubig sa MCWD gikan sa supplier nga mikuha og tubig sa Luyang River, kay nagtoo gyud  ko nga gamay ra ang tubig nga ilang gipalit ug nagsalig na lang ang MCWD sa ilang mga deep well ug sa dam.