EDITORYAL - Suliran sa DepEd

Niadtong adlaw nga Sabado Oktubre 5 gisaulog sa Pilipinas ang World Teacher’s Day agi og pagila sa ilang halangdong propesyon, ang pagtudlo ug matuto sa mga kabataang Pilipino aron sila mamahimong responsable ug mapuslang molupyo sa nasud.

Apan sa pagkatinuod bugtong ang pasyon nalang sa pagtudlo ang nagpagana sa mga magtutudlo bisan og nalubong na sila sa utang tungod sa kagamay sa ilang suholan ilabi niadtong mga naa pa sa kinaubsang posisyon.

Makapila na ka higayon nga adunay gianunsyong mga usbaw apan gamay ra kaayo ug wa katabang sa ilang sitwasyon.

Ning bag-o lang, dunay maayong balita gikan ni Presidente Duterte  nga bag-o pang nabalik gikan sa Russia, siya mianunsyo nga basin patas-an og 35 porsiyento ang suholan sa mga magtutudlo.

Apan pagkatinuod dili lang ang suholan ang problema. Kada tuig nagkadaghan ang populasyon sa tinun-an apan pipila lang ka buok ang na-rekrut nga bag-ong magtutudlo tungod kuwang ang plantilla positions.

Gibutyag ni Senate President Pro Tempore Ralph Recto nga pagkakaron kapin sa 700 mil ka mga public school teachers ang nangaungot karon sa ilang kasamtangang posisyon kay way bakante para promosyon.

Gibutyag sab sa senador nga kuwang ang ang-ang sa promosyon sa mga magtutudlo. Gikan sa Teacher I (Salary Grade 11), Teacher II (SG 12), kutob lang sa Teacher III (SG 13), sunod dayon ang Master Teacher I (SG 18), II (SG 19), III (SG 20).  Nagpasabot nga way plantilla position para sa salary grade 14,15,16, ug 17.

Ang gobiyerno nagpasweldo base sa gitawag og salary grades. Matag posisyon gikan sa ubos pataas dunay kasakbang kun pila ang sweldo matag buwan.  Kun ingon niini nga pipila lang ang bakanteng posisyon para sa promosyon, daghang magtutudlo ang nag-antos sa kasamtangan nilang sweldo.

Samtang maayo kining planong usbaw sa suholan apan dili kini malungtarong solusyon sa problema kun dili dugangan ang mga plantilla positions alang sa paglambo sa ilang propesyon ug kauban niini ang suholan.