Baligho ni Albayalde

Human sa iyang kusganong panawagan ngadto sa Senado nga ipublikar ang mga pangalan sa mga polis nga nalambigit sa “drug recycling,” nasugamak sa dakong baligho si PNP Chief Oscar Albayalde human mogawas ang mga pangalan sa iyang mga sakop niadtong siya nagsilbi pa nga hepe sa kapolisan sa Pampanga.

Sigun sa listahan nga gisubmitir ni Baguio City Mayor Benjamin Magalong ngadto sa Senado, 13 ka mga polis nga sakop ni Albayalde niadto ang nag-unang nalambigit sa drug recycling. Mitumaw pa atol sa hearing ang posibling kalambigitan sab sa hepe sa kapolisan sa nasud sa illegal nga kalihukan sa iyang mga sakop tungod sa matud pa pagprotehir niya kanila.

Sigun sa kasayuran dunay 160 ka kilos sa shabu ang gi-recycle sa mga sakop ni Albayalde niadtong tuig 2013. Ang maong illegal nga drugas kabahin sa nasakmit gikan sa giingong Chinese drug lord nga si Johnson Lee atol sa gihimong buy-bust operation niadtong Nobyembre sa tuig 2013 didto sa Mexico, Pampanga.   

Ang operasyon gipangulohan ni  Lt. Col. Rodney Raymundo Louie Baloyo uban nilang  Capt. Joven de Guzman, Jr.,  Master Sergeant Jules Lacap Maniago, Master Sergeant Donald Castro Roque, Master Sergeant Ronald Bayas Santos, Master Sergeant Rommel Munoz Vital,  Master Sergeant Alcindor Mangiduyos Tinio, Master Sergeant Dante Mercado Dizon, Master Sergeant Eligio Dayos Valeroso, Staff Sergeant Dindo Singian Dizon, Staff Sergeant Gilbert Angeles de Vera, Staff Sergeant Romeo Encarnacion Guerrero, ug Corporal Anthony Loleng Lacsamana.

Sigun ni Magalong ang 13 mga sakop ni Albayalde ug iya ning giimbistigahan niadtong siya pa maoy hepe sa Criminal Investigation and Detection Group (CIDG) human masayri ni kanhi PNP Chief Allan Purisima nga dunay anomaliya sa operasyon. Nakatimaho ang kadagkoan sa kapolisan og tinunto sa maong operasyon human silang tanan, apil si Albayalde, giingong nagdungan og pamalit og sports utility vehicle (SUV) human sa maong operasyon.

Sumala pa nga moabot og kapin sa 200 kilos ang kinatibuk-ang drugas nga nasakmit apan gi-recycle sa maong mga polis ang 160 kilos. Gawas niini gikatahong gibuhian pa gyud ang dinakpang drug lord bugti sa P50 milyones.

Matud ni Magalong nga niadtong 2014 gimando nga taktakon sa serbisyo ang 13 ka mga polis nga gipasanginlang nalambigit sa anomaliya, apan giingong giduphan sila ni Albayalde. Inay mapalagpot sa serbisyo igo lang gi-demote ang maong mga polis.

Ang tanang pasangil hinuon kusganong gihimakak ni Albayalde. Apan ang Department of Interior and Local Government milusad na ron og imbistigasyon batok sa hepe sa kapolisan sa nasud.

Sa pagtumaw sa pasangil nawad-an og kridibilidad ang liderato ni Albayalde paglimpiyo sa PNP gikan sa mga scalawags. Busa aron pagsalbar sa organisasyon angayang mohimo si Albayalde sa labing dakong sakripisyo pinaagi sa pagluwat sa katungdanan.

Si Albayalde gitakda na untang moretiro sa katungdanan karong Nobyembre 8.