Panahon na nga mosagop

Murag nakaamgo na gayud ang ubang sakop sa transport sector dinhi sa Sugbo. Kay klaro nga nagkagamay na kadtong gusto mosimpatiya sa kawsa ug mokuyog sa mga lihok protesta nga ipahigayon sa mga organisasyon.

Kay si kinsa ba gyuy ganahan mosalga sa mga protesta kun mawad-an na hinuon ka sa imong inadlaw’ng kita kay lagi wala nakapamasahero kay tua nagmartsa ug punay’g siyat nga nagbaktas sa karsada aron pagsuporta sa kawsa.

Gani, niadtong nationwide transport strike sa niaging adlaw, mokabat sa 50 lamang kuno ka operator ug drayber sa public utility jeepney (PUJ) ang miapil dinhi sa Metro Cebu basi usab sa mga report sa media.

Ang ilang protesta gisentro batok sa programa sa gobiyerno nga i-modernized ang PUJ sector. Ug kabahin niining maong protesta ang pagbatok sa pag-phase out sa mga pampasaherong jeepney nga 15 ka tuig na ang pangidaron.

Hinuon dili na gyud malikayan ang pag-arangkada sa modernisasyon sa maong sektor. Mao nang nangahadlok ang kinabag-an sa mga operator ug drayber kay basin kuno kon makulban siya og kaldero.

Kini bisan pa man sa assurance sa kagamhanan nga dili gayud niini pasagdan ang mga operator ug drayber. Gani adunay programa ang gobiyerno nga naghatag og ayuda sa mga miyembro sa maong sektor.

Wala man siguroy ikahadlok ang maong sektor inig ligid na sa modernisasyon sa PUJ. Apan tungod lagi kay naanad na og protesta kining mga sakop sa sektor, inabagan usab sa mga walhong organisasyon, dayon na lamang sila og siyaok sa kadalanan.

Kay mosugot sila ug sa dili, wala nay babag sa implementasyon sa PUJ modernization. Mao nang wala na gyuy kapuslanan ang mga tagawtaw sa kadalanan batok niini. Hinuon, panahon na gayud nga mosagop ang maong sektor sa bag-ong teknolohiya aron dili kini mabiyaan sa panahon.