Post sa Facebook

Sa dihang akong gihimo ang pag scan sa akong FB Account akong nasugatan ang post nga nagkanayon: “After you’ve said all that is bad about me, would you mind to say also the good I did to you!” Tulukibon nga mga pulong nga nagdala usab og kamatuoran sa kun unsa ug kinsa kitang matanga sa pagkatawo.

Nga sa ato pa nga kun dautan ang atong panlantaw sa atong kaugalingon ingon ini usab ang atong panlantaw sa atong isigkaingon.

Nakapunting lang kita sa bisan unsang negatibo ug gani nahikalimot kita nga gawas sa bisan unsang negatibo dunay mas nindot pa nga atong ma post diha sa facebook.

Dili man sa tanang higayon nga seryoso. Kun atong seryosohon ang kinabuhi malisud alang nato ang pagsuta kun unsay angayan natong himoon aron lamang kita mabuhi ug malingaw.

Hinuon tingali ang pagpunay og yawit og mga pulong makadaut sa uban tingali nakahatag kanato og kalingawan. Kalingawan tungod kay kita pud mismo nahimo mang biktima sa atong kaugalingong kahaguka labina sa mga higayon nga matay-og kita sa daghan kaayong mga problema. Mao nga sa maong katay-ogan nangita kita og kahigayonan nga magaan gaanan ang atong gipas-an mao nga imbis atong tan-awon ang bisan unsang bati nga nia nato aron sa ingon inig abot sa panahon ato kining mapakgang, mas mouyon man nuon kita nga ang bati sa uban maoy himoon natong sumsoman. Ang resulta atong mamantala sa social media ang tanan nga bati nga giisip nato ngadto sa usa ka tawo.

Apan sa laing bahin, mas makahuloganon dako uyamot nga sa atong pagyawit sa mga bati ato pud untang hinumdoman ang bisan unsang maayo nga atong nakita sa atong isigkaingon. Kinahanglanon kaayo kini aron sa ingon atong mamantala ang positivity bisan diin ug aron mamahimong positibo ang matag usa kanato sa atong panlantaw sa kinabuhi. Ning paagiha nahimong daw mas nindot puy-an ang kinabuhi ug ang kanindot niini maoy magdala kanato ngadto sa tiunay nga kalinaw. Malinawon ta kay walay tawo nga atong gipasakitan. Malinawon ta tungod kay wala kitay gidaut sa kaulahian. Sa atong panaw maayo unta kun atong makita ang bili sa pagsulti og maayo ug dili ang pagsulti og dautan. Kay ang matag pulong nga atong malibkas mosalamin man sa atong kaugalingong pagkatawo. nga sa ato pa, hunahunaa sa makadaghan kun angayan ba nimong i post sa facebook ang imong kalagot sa imong bana o asawa, kapuso o kapamilya basin sa kaulahian mohilak ka.